HANDA na ang Las Piñas City sa nalalapit na pagsasagawa ng malawakang pagbabakuna kaugnay ng inaasahang pagdating ng COVID-19 vaccines sa bansa ngayong buwan.
Ito ay matapos ang pagbisita sa lungsod ng COVID-19 Vaccine Code Team sa pangunguna ni Inter-Agency Task Force (IATF) Chairperson and Department of Health (DOH) Secretary Francisco T. Duque III nitong Pebrero 9.
Tinanggap ni Mayor Imelda “Mel” Aguilar kasama si Vice-Mayor April Aguilar, ang grupo na kinabibilangan din nina DOH Regional Director Ma. Paz Corrales, Department of the Interior and Local Government (DILG) Assistant Secretary Marcelo C. Morales, Department of Svience and Technology (DOST) Undersecretary Rowena Guevarra, Assistant Bureau Director National Barangay Operations Office (NBOO-DILG) Director Debbie T. Torres, CESO V; at iba pang kinatawan ng DOH at Presidential Communications Operations Office (PCOO).
Iprinisinta naman sa team ni Dr. Juliana Gonzales, ng City Health Office, ang local COVID-19 Situation Report ng Las Piñas City at COVID-19 Vaccination Plan bilang patunay na handang-handa na sa mass vaccination program ang lungsod.
Binigyang-diin ni Mayor Aguilar na ligtas at epektibo ang mga bakunang papasok sa lungsod kaya hinikayat ang mga taga-Las Piñas na makiisa sa vaccination program ng gobyerno lalo na’t inaasahang darating sa bansa ang vaccines ngayong Pebrero. (DAVE MEDINA)
191 
