TATLONG sinasabing mga sabungero na tumakas sa isinagawang police raid sa isang tupadahan, ang natagpuang palutang-lutang sa iba’t ibang bahagi ng Davao river sa Baguio District sa Davao City.

Sa inisyal na ulat, kabilang umano sa mga nagsasabong ang tatlong lalaki nang salakayin ng mga pulis ang sabungan noong Linggo sa Purok 6, San Miguel, sa Barangay Gumalang, Baguio District.

Unang nakita noong Lunes ng hapon sa Davao river sa Barangay Dacudao, Calinan District ang bangkay ni John Hanzel Pagapang.

Kinabukasan, araw ng Martes ay nakita ang bangkay ni Dennis Manipis sa Davao river sa Barangay New Carmen, Tugbok District.

Huling nakita ang bangkay ni Mark Joel Agusan sa Davao river sa Barangay Mandug, Martes din ng umaga.

Ipinag-utos ang imbestigasyon sa nasabing insidente ngunit lumilitaw na may 13 indibidwal ang nadakip sa pagsalakay ng mga pulis dahil sa sabong.

Ayon kay P/Major Archilles Bargio, hepe ng Baguio Police, may 50 katao ang dumalo sa tupada ngunit pagdating ng mga pulis ay nagpulasan ang mga ito at may ilan umanong tumalon sa Davao river para makatakas.

Itinanggi naman ni Bargio na nagpaputok ang mga pulis pagdating sa area kaya nag-panic ang mga tao. (JESSE KABEL)