MAAARI nang makapagbigay ang One COVID-19 Referral Center ng mas maayos at pinagbuting serbisyo sa callers sa oras na mailipat na ang headquarters nito sa mas malaking venue.

Ayon kay treatment czar at Health Undersecretary Leopoldo Vega, nakagawa na ng kasunduan ang pamahalaan na ilipat ang referral center’s headquarters sa Philippine International Convention Center mula sa Metro Manila Development Authority complex.

“The MMDA complex is becoming small for the number of workers and the number of gadgets that we have for the command,” ayon kay Vega.

“Siguro po mga middle of May we will transfer and we will be able to provide you a better service and a better functionality,” dagdag na pahayag nito.

Ayon pa kay Vega, 85 katao ang itatalaga bilang call center agents sa referral center matapos makapasa sa interview.

Nauna rito, umapela naman ang command center para sa mas maraming call-takers at coordinators sa gitna ng pagtaas ng kaso ng COVID-19 dahil sa naiiwang 300 calls kada araw.

Ani Vega, marami nang linya ng telepono ang binuksan matapos na ang center’s system ay nakabit sa Department of Information and Communications Technology at telecommunications provider PLDT.

Ang mga nangangailangan ng tulong ay maaaring tumawag sa 02-886-505-00, 0915-777-7777, or 0919-977-3333.

“We hope this will not just be for COVID but even in post-COVID we will have a national referral system all over the Philippines connecting the different hospitals, LGUs for access and even for financial services that are needed by the patient,” ayon kay Vega. (CHRISTIAN DALE)