Ni ANN ENCARNACION
UMABANTE sa final round ng athletics men’s 400m T52 ng 2020 +1 Tokyo Paralympic Games si Filipino wheelchair racer Jerrold Mangliwan.
Tumapos si Mangliwan sa ika-pitong pwesto ng nasabing event, sapat para umusad siya sa final round Biyernes sa Olympic Stadium-Track.
Nakapagtala ang 41-year-old wheelchair racer sa men’s 400m T52 Heat 1 ng 1 minuto at 3.41 segundo.
Ang top 8 sa pagtatapos ng heats ang papasok sa finals, na nakatakda 7:16 ng gabi sa nasabi ring araw.
Maliban sa men’s 400m T52, lalahok din si Mangliwan sa men’s 1500m-T52 bukas (Agosto 29), at men’s 100m-T52 (Setyembre 3).
GAWILAN KINULANG SA SWIM EVENT
NABIGONG makalangoy sa finals ng swimming men’s 200m individual medley-SM7 ang Pilipinong para-swimmer na si Ernie Gawilan.
Pumang-lima lang si Gawilan sa Heat 1 ng men’s 200m individual medley-SM7 na ginanap Biyernes ng umaga sa Tokyo Aquatics Centre.
Nagtala ang 30-year old Pinoy ng 2:50.49 segundo at tumapos na 9th place overall, kapos ng isa para mapasama sa final round.
Gaya sa ibang sport events, tanging top 8 lang ang aabante sa finals.
Samantala, may pagkakataon pang bumawi si Gawilan, na sunod na lalangoy sa men’s 400m freestyle-S7 sa Linggo at men’s 100m backstroke-S7 sa Lunes.
187 
