NADAGDAGAN ang pagkadismaya ng ilang mambabatas sa Procurement Service ng Department of Budget ang Management (DBM) dahil sa hindi naideliber na P5.53 billion halaga ng learning materials ng Department of Education (DepEd).
“Nakakagalit makarinig ng ganitong balita matapos makita ang pinagdaanan ng mga guro at magulang na kanya-kanyang sikap sa paghahanap ng gadgets, kanya-kanyang diskarte sa pagkalap ng papel, ink at printer sa pag-print ng mga module,” ani ACT party-list Rep. France Castro.
Ayon sa mambabatas, kabilang ang DepEd sa hindi mabilang na ahensya ng gobyerno na naglipat ng pondo sa PS-DBM na dating pinamumunuan ni Lloyd Christopher Lao para bilhin ang mga kailangan ng mga guro sa pagtuturo at maging ang mahihirap na estudyante na naapektuhan sa pandemya.
Nabatid na umaabot sa P6.65 billion ang inilipat ng DepEd sa PS-DBM kung saan P5.03 billion dito ay pambili umano ng mga computer hardware and software, at P502.83 million naman para sa iba’t ibang instructional at learning material at textbooks.
Gayunman, hindi umano naideliber ng PS-DMB ang computers at learning materials na nagkakahalaga ng P5.53 billion.
“These P5.53 billion worth of computer hardware and software, textbooks and other learning materials it procured from the Procurement Service–Department of Budget and Management (PS-DBM) in 2020 should have aided thousands of students and teachers in the blended distance learning,” ayon sa mambabatas.
“This undelivered learning materials shows the Duterte administration’s lack of priority, urgency and belittles the importance of providing access to quality education amid a pandemic,” ani Castro.
Dagdag pa ng mambabatas, halimbawa ito ng pagpapabaya ng DepEd at Duterte administration sa mga guro at kabataan. (BERNARD TAGUINOD)
183 
