CAVITE – Tinatayang mahigit P3 milyon halaga ng umano’y shabu ang nasamsam sa arestadong tatlong hinihinalang tulak ng ilegal na droga sa isinagawang buy-bust operation sa isang subdibisyon sa Bacoor City noong Huwebes ng hapon.
Kinilala ang naarestong mga suspek na sina Marvin Espiritu, alyas “Barron”, 30, negosyante; John Paul Reyes, alyas
“Kuya”, 26, delivery rider, at Christine Bautista Alvaran, alyas “Nanay”, 25-anyos.
Ayon sa ulat ni P/SMSgt. Robertson Vallejo ng Bacoor City Police, dakong alas-3:10 ng hapon noong Huwebes nang ikasa ng Bacoor City Police at PDEA NCR ang buy-bust operation sa harapan ng 90’s Craving Store sa loob ng Floraville Subd., Panapaan 1, Bacoor City.
Dumating ang mga suspek sakay ng isang Toyota Avanza at nakipag-transaksyon sa poseur buyer na nagresulta sa kanilang pagkakaaresto.
Nakumpiska sa mga suspek ang tinatayang 500 gramo ng hinihinalang shabu na P3,400,000 ang street value, na nakita sa loob ng kanilang sasakyan, at boodle money. (SIGFRED ADSUARA)
231 
