NANINDIGAN ang lokal na mga kandidato ng UniTeam sa Maynila na solid at buo pa rin ang kanilang suporta sa tambalan nina Presidential aspirant Ferdinand ‘Bongbong’ Marcos at Vice Presidential bet Sara Duterte sa gitna ng mga lumalabas na isyu na umano’y paglipat ng katambal ng presidential daughter.

Ayon kay Manila Mayoralty candidate Alex Lopez, namataan ng kanilang grupo ang ilang posters kung saan ang itinatambal kay VP aspirant Sara si Manila Mayor Isko Moreno.

“May posters this morning na ang kasama ni VP Sara ay si Mayor Isko, may mga politiko na nagpopondo rito pero ayaw nating magbintang. Bigyan natin sila ng benefit of the doubt. Basta kami ay united at nagkakaisa sa aming pambatong BBM-Sara,” ani Lopez.

Nagpasalamat din siya sa patuloy na suporta ni Duterte at sa pagkampanya nito sa kanilang tambalan sa kabila ng ilang isyu kay BBM.

“We thank her for inspiring and uniting us despite the issues. This dispels any rumor na may disunity sa grupo. Her unwavering support for BBM and to our senatorial line up is an inspiration to all of us na magtuloy sa laban,” ani Lopez.

Giit pa niya, hindi nila pipigilan ang sinomang kandidato na nasa kanilang grupo kung nanaising lumipat ng kampo at rerespetuhin lamang ang kanilang desisyon.

“We will remain committed to our candidates. For those who may want to cross party lines, we respect their decision dahil free country tayo. Magpapasalamat pa rin kami dahil susuportahan pa rin nila ang ating VP Sara,” dagdag pa niya.

Nagpahayag din ng kahandaan ang anak ni dating alkalde Mel Lopez sa darating na pagsisimula ng campaign period para sa mga lokal na kandidato at iginiit na babayaran ang utang ng lungsod at hindi ipapasa sa Manilenyo.

“We will not resort to raising the real estate taxes at iba pang buwis na binabayaran ng mamamayan. Wag naman po dahil mabigat na ang kanilang hinaharap. Marami po tayong magagawa upang mabayaran ang inutang ng mga nakaraang administrasyon,” wika ni Lopez.

Ngayong Sabado nasa Maynila ang ‘agila’ ng Davao City na si Mayor Sara na patuloy na isinisigaw ang BBM sa tuwing magsasagawa ng motorcade sa iba’t ibang panig ng bansa.

Salamat, Mayor Sara! – Atty. Lopez

Bumisita si Mayor Sara sa Manila Muslim Community and Grand Mosque and Cultural Center sa Globo de Oro St., Quiapo, Manila saka tumungo sa Galas Covered Court.

Ipinakita ni Sara ang buong suporta sa kanyang ka-tandem na si BBM.

Ipinahayag din ni Mayor Sara ang kanyang pagsuporta sa local candidates ng UniTeam sa Maynila partikular na ang Mayoralty candidate na si Atty. Lopez at aspirant Vice Mayor Raymond Bagatsing.

Ayon kay Sara, naniniwala siya sa kakayahan ni BBM dahil marami na itong naging karanasan bilang legislator na kailangan ng bansa.

Nagpapasalamat naman si Atty. Lopez sa ibinigay na suporta ng mga kapatid na Muslim at district leaders sa pagdalaw ni Mayor Sara sa Maynila. (JULIET PACOT)