DUMAGSA sa tanggapan ng Manila Police District-General Assignment and Investigation Section (MPD-GAIS) ang 22 individual na umano’y nabiktima ng illegal recruitment makaraang mahuli ng mga tauhan ng MPD-Raxabago Police Station 1 ang apat na mga suspek noong Marso 7 ng madaling araw sa Tondo, Manila.

Mula sa MPD-Station 1, itinurn-over sa MPD-GAIS ang hinihinalang mga illegal recruiter na sina Daphine Lorraine Uy, 31, compliance officer; Arnelyn Grace Clemente, 32, chief marketing officer; Armand John Clemente, 30, at Kenneth Jay Sarmiento, 29, field supervisor.

Nadakip ng mga tauhan ni P/Lt. Col. Cennon Vargas Jr., commander ng MPD-Station 1, ang mga suspek bandang alas-3:00 ng madaling araw sa bisinidad ng Urban Deca Homes sa Velasquez St. sa Tondo, makaraang humingi ng tulong ang mga biktimang sina Milo Beriguel at Frederick Martinez.

Matapos mai-blotter at isailalim sa medical check-up ang mga suspek ay itinurn-over sa MPD-GAIS na dinagsa ng umano’y mga biktima ng mga ito.

Nahaharap ang mga suspek sa kasong paglabag sa RA 8042 (Migrant Workers and Overseas Filipinos Welfares Act 1995) at estafa. (RENE CRISOSTOMO)