IPINAG-UTOS ni Philippine National Police chief, P/General Dionardo Carlos sa PNP-National Capital Region Police Office (PNP-NCRPO) na imbestigahan ang background at posibleng mga kasong kinasasangkutan ng anim na pulis Caloocan na sinibak at inilagay sa restrictive custody dahil sa kasong pagnanakaw sa isang padre de pamilya.

Kasabay nito, nanawagan si Gen. Carlos sa iba pang mga biktima ng anim na pulis Caloocan na sinasabing sangkot sa pagnanakaw, na makipag-cooperate sa mga awtoridad.

Ayon kay PNP Public Affairs Office chief, P/BGen. Roderick Augustus Alba, nasa restrictive custody na ngayon ang anim na pulis na mga miyembro ng Caloocan Drug Enforcement Unit, at iniimbestigahan ng PNP Internal Affairs Service (IAS).

Kinilala ang mga suspek na sina P/Cpl. Noel Espejo Sison, P/Cpl. Rommel Toribio, P/Cpl. Ryan Sammy Gomez Mateo, P/Cpl. Jake Barcenilla Rosima, P/Cpl. Mark Christian Abarca Cabanilla, at P/Cpl. Daryl Calija Sablay.

“The involved personnel were immediately relieved so a fair investigation can proceed without any undue influence. They are now under restrictive custody, and disarmed of their service firearms,” ani PNP chief, Gen. Dionardo Carlos sa inilabas na pahayag.

Matatandaang nakunan ng CCTV ang insidente ng pagkuha umano ng nasabing mga pulis sa P14,000 halaga ng ayuda na natanggap ng biktimang si Eddie Yuson, 39, mula sa livelihood program ng Department of Social Welfare and Development noong Marso 27, 2022.

Nagsasagawa umano ng anti-illegal drug operation ang mga pulis nang mangyari ang insidente.

Inatasan na rin ni Gen. Carlos si NCRPO chief, P/MGen. Felipe Natividad na magsagawa ng malalimang imbestigasyon hinggil sa insidente.

“Scalawags and erring members have no place in the PNP and rest assured that we will never tolerate unlawful acts perpetrated by our members,” pahayag ni Natividad. (JESSE KABEL)