IMINUNGKAHI ng isang lider ng Kamara kay President-elect Ferdinand “Bongbong” Marcos Jr., na buhayin ang joint oil exploration sa pagitan ng Pilipinas at China sa West Philippine Sea (WPS) subalit kailangan patunayan muna aniya ng Beijing na “kaibigan” ang turing nito sa atin.

Ginawa ni House ways and means chairman Joey Salceda ang mungkahi matapos tuldukan ni Pangulong Rodrigo Duterte ang kasunduang ito sa China ilang araw bago bumaba sa puwesto.

“I strongly suggest to PBBM that we renegotiate a way to approximate an inventory of WPS energy assets independently, with international observation and audit. That way, we know the kind of resources we are negotiating about without undermining our sovereignty,” anang mambabatas.

Gayunpaman, kailangang patunayan din aniya ng China na kaibigan ang turing sa Pilipinas upang makuha ang tiwala ng mga Pilipino habang nag-uusap para sa nasabing kasunduan.

“Philippine government must make China understand that if they want us on friendlier terms, especially on resource development, they have to pay up,” giit ni Salceda.

Ipinaliwanag nito na hindi ang China ang major investor sa Pilipinas kundi ang Singapore at mas malaki ang ipinauutang ng Japan sa atin kumpara sa Beijing at walang-wala rin umano ang mga ito sa United States (US) pagdating sa export market.

“So, if they want our favor, they have to pay up. Invest more in the country. Send us more tourists. Give us cheaper loans. Otherwise, what it will look like is a military superior country just trying to coerce another neighbor,” dagdag pa ng mambabatas.

Sa ngayon aniya ay ang Japan ang itinuturing na best friend ng Pilipinas kaya kung nais umano ng China na maging kaibigan ng Manila ay kailangang magpakitang gilas ito at kunin ang tiwala ng mga Pilipino. (BERNARD TAGUINOD)