DALAWA lang sa 14-member national women’s volleyball squad na sasabak sa Asian Volleyball Confederation Cup for Women ang hindi kabilang sa University Athletic Association of the Philippines (UAAP) champ National University.
Ito ay sina Trisha Mae Genesis ng Akari at Jelaica Gajero ng California Precision Sports, habang ang 12 ay pawang NU members na sa pangunguna ni Rookie at Most Valuable Player Mhicaela Belen.
Ang 11 pang NU players ay sina Ivy Keith Lacsina, Shaira Jardio, Evangeline Alinsug, Princess Robles, Shena Toring, Jennifer Nierva, Nicole Mata, Alysa Solomon, Camilla Lamina, Kamille Cal at Joyme Cagande.
Ayon kay Philippine National Volleyball Federation (PNVF) president Ramon “Tats” Suzara, pangungunahan ang coaching staff ni Brazilian Jorge Edson Souza de Brito habang magsisilbing assistants sina Karl Dimaculangan at Cherry Macatangay, kasama si trainer Jerome Guhit at physical therapist Grace Gomez.
Sampung nangungunang koponan sa Asya, kabilang ang host Pilipinas, ang makikibahagi sa 7th edition ng AVC Cup, originally nakaiskedyul noong 2020 ngunit dahil sa COVID-19 pandemic ay gaganapin ngayong Agosto sa PhilSports Arena, Pasig City.
Naka-bracket ang Pilipinas sa Pool A kasama ang reigning champion China, South Korea, Iran at Vietnam. Ang Pool B ay binubuo ng 2018 runner-up Japan, Thailand, Kazakhstan, Chinese Taipei at Australia.
Sa Agosto 21-25 preliminaries, haharapin ng Pilipinas ang Vietnam sa 21, China sa 23, Iran sa 24 at South Korea sa 25.
Ang mangungunang limang koponan bawat pool ay uusad sa knockout quarterfinals sa 27, semifinals sa 28, at finals sa 29. (ANN ENCARNACION)
128
