DRUG SMUGGLING SA PINAS

boc

Ni YOGI FILEMON RUIZ

Commissioner, Bureau of Customs

SA kinakaharap na problema ng bansa sa droga, pinakamainam palagi kung puntirya natin ay ang tinatawag na “supply chain” na posible lang kung mapipigilan natin ang pagpasok ng ipinagbabawal na gamot sa ating lupain.

Walang dudang marami na ang isinulat at inilimbag na babasahin hinggil sa salot na dala ng droga sa ating lipunan, kung paano ito pumapatay sa mga mamamayan habang patuloy ang pagyaman ng mga sindikato sa likod ng kalakalan ng drogang laganap sa ating pamayanan.

Buwan ng Mayo ng nakalipas na taon nang ilabas ng United Nations Office on Drugs and Crimes ang isang ulat na lubhang ikinabahala ng mara­ming bansa sa Timog-Silangang Asya – kabilang ang Pilipinas.

Sa ulat na may titulong “Synthetic Drugs in East and Southeast Asia: Latest Deve­lopments and Challenges in 2022,” isang babala ang sad­yang pinahugong sa mga posib­leng kahinatnan ng mga bansang mabibigong puksain ang ilegal na kalakalan ng drogang nakapagtala ng pinakamalaking kita sa gitna ng pandemya.

Malinaw ang buod ng ulat – lumalaki ang kita ng mga sindikato, habang dumarami ang biktima at lumalawak ang perwisyong kalakip ng bisyo.

Kabilang sa mga tinukoy na “major transit points” sa pagpasok ng mga kontrabando sa Pilipinas ang Malaysia na dalawang oras na byahe lang sa karagatan ang layo sa gawing timog ng ating kapuluan. Tukoy rin ang isang sindikato sa likod ng drug smuggling papasok ng Pinas. Paglalarawan ng United Nations Office on Drugs and Crimes, malaki, makapangyarihan at maimpluwensya ang nasabing grupong namamayagpag ma­ging sa mga bansang Indonesia, Japan, Australia at New Zealand. Sa mada­ling salita, hindi lang Pilipinas ang nahaharap sa problemang dala ng salot na droga. Hindi lang din usapin sa kalusugan ang lintik na droga. Ito’y dagok sa ating ekonomiya at dagdag gastusin sa ating pamahalaang kinakailangan pang maglaan ng pondo para sa rehabilitasyon – bukod pa sa pagkasira ng maraming pamilya.

24

Related posts

Leave a Comment