MAGSASAGAWA ng pagdinig ang Senate committee on public services sa pangunguna ni Sen. Grace Poe kaugnay sa aplikasyon para sa prangkisa ng Maynilad Water Services Inc. at Manila Water Co. Inc., ngayong Miyerkoles, Setyembre 1, ganap na alas-10:30 ng umaga.

“Layon ng aming kumite na matiyak na ang kapakanan ng taumbayan ang mangunguna sa interes ng mga franchise applicants,” pahayag ni Poe.

Una nang tiniyak ng senadora na daraan sa matinding pagbusisi ang aplikasyon ng mga kumpanya kasabay ng hamon sa mga ito na huwag lamang tumutok sa pagbibigay ng ligtas at malinis na tubig at sa halip ay tiyakin ang tuloy-tuloy na suplay.

Sa pag-aaral ng Asian Development Bank noong 2013 at 2016, nangulelat ang Pilipinas sa 48 bansa sa Asia-Pacific sa water security dahil sa hindi maayos na pamamahala.

Sa kasalukuyan, 15 milyong Pinoy ang wala pa ring access sa malinis na tubig habang 55 katao ang namamatay kada araw dahil sa mga problema sa tubig.

“Ngayon, higit kailanman, kailangan ng taumbayan ang ligtas at abot kayang tubig upang malabanan ang hindi natin nakikitang virus,” giit ni Poe.

Kasama sa tatalakayin sa pagdinig ang House Bill (HB) 9422 o “An Act granting Maynilad Water Services Inc. a franchise to establish, operate, and maintain a water supply and distribution system and sewerage and sanitation services in the west zone service area of Metro Manila and province of Cavite”; at HB 9423 o “An Act granting Manila Water Co. Inc. a franchise to establish, operate, and maintain the waterworks and sewerage system in the east zone service area of Metro Manila and province of Rizal.”

Kabilang sa mga kumpirmadong dadalo sa pagdinig ay sina Metropolitan Waterworks and Sewerage System Chief Regulator Patrick Lester Ty, Deputy Administrator for Technical Regulation Evelyn Agustin, Deputy Administrator for Administration and Legal Affairs Claudine Orocio-Isorena, Acting Deputy Administrator for Financial Regulation Christopher Chuegan, Legal Affairs Department Manager Crescenciano Minas Jr., Head Technical Assistant Ivan Bernard Samson; Department of Justice State Counsel Melvin Suarez; Philippine Competition Commission’s Jared Rivera at Ramon Jeriel Sawit.

Dadalo naman sa panig ng Manila Water Co. Inc. sina Chief Regulatory Officer Donato Almeda, Director Rene Almendras, Chief Finance Officer Ma. Cecilia Cruzabra, East Zone Chief Operating Officer Abelardo Basilio, Corporate Secretary Silverio Benny Tan, Enterprise Legal Services and Regulatory Support Head Ia Laurienne Ramiro-Castro, at Enterprise Regulatory and Stakeholder Engagement Group Head Jo Kristine Revil at External Counsel Ninez Maningat.

Sa hanay naman ng Maynilad Water Services Inc., dadalo sina President and Chief Executive Officer Ramoncito Fernandez, Chief Operating Officer Randolph Estrellado, Chief Finance Officer Ricardo Delos Reyes, Regulatory Affairs Head Marianina Guilbert, Legal Affairs Head Mercedita Ona-Saldua, Corporate Secretary Alex Fider, at Assistant Corporate Secretary Kristina Caro Gangan.

Inaasahan din sa hearing si Laban Konsyumer Inc. President Victorio Dimagiba. (DANG SAMSON-GARCIA)