(NI DAVE MEDINA)

NAGBABALA  ang  Manila International Airport Authority (MIAA) sa mga airline company na huwag gamiting dahilan ang 6.1 magnitude na lindol sa delay o kanselasyon ng kanilang mga biyahe.

Ayon kay  MIAA  General Manager Ed Monreal, huwag hayaang magkaroon ng inconvenience ang mga pasahero na maaaring magresulta sa hindi pagkatuloy  ng kanilang travel plans.

Kasabay nito ay tiniyak ni Monreal  na walang anumang nasira sa runway o maging sa taxiway ng Ninoy Aquino Airport, at ang mga terminal building ay maayos batay sa isinagawang inspeksyon ng mga team ng MIAA.

Sinabi pa ni GM Monreal sa mga pasaherong dadaan ng NAIA terminal,  na  business as usual at walang dapat na ipag-alala dahil sa lindol kahapon.

Inatasan naman  ni Monreal ang  operations team ng airport na tanggapin  ang mga flights na hindi kayang asikasuhin ng  Clark International Airport, alinsunod sa standard operating procedures na ipinatutupad ng  Civil Aeronautics Board at Civil Aviation Authority of the Philippines.

Hinimok din ni Monreal ang mga airlines  na tiyaking may nakahandang  shuttle buses na maghahatid sa mga pasahero mula sa Maynila patungo ng  Clark International Airport.