ISA na namang police corporal mula sa Regional Police Security at Protection Unit 11 sa Davao, ang dinisarmahan at nahaharap sa pagkasibak sa serbisyo matapos magpositibo sa random drug test noong Lunes, Marso 15.

Sinabi ni OIC PNP Police Lt. Gen. Guillermo Eleazar, si Police Corporal Donree Gall P. Adug ay isinailalim sa pre-charge evaluation investigation at summary hearing procedure matapos ang kanyang urine specimen coded bilang LOIDT-PSPGDT-074-2021RCLO11, ay na-screen at nakumpirmang positibo sa presensiya ng methamphetamine hydrochloride.

Ang random drug test ay isinagawa sa 41 personnel ng Regional Police Security and Protection Unit 11 sa Camp Capt. Domingo E. Leonor, San Pedro St., Davao City.

Lahat ng 40 personnel na sumailalim sa pagsusuri ay negatibo sa methamphetamine at THC-metabolites, maliban kay Adug na nagpositibo.

“We should continue our random drug tests to get rid our organization of drug addicts and users,” ani Eleazar.

Si Eleazar ay pansamantalang itinalagang OIC ng PNP matapos mag-leave of absence si Gen. Debold Sinas na nagpositibo sa COVID-19 kamakailan. (JOEL O. AMONGO)