POSISYON SA PAGTULOG MAY KINALAMAN SA KALUSUGAN

PAGTULOG-1

Batid natin na ang pagtulog ay malaking benepisyo ang nagagawa sa ating kalusugan.

Kung mas tama ang haba ng tulog o kung sapat ito ay agad na nare-repair ang napagod at nasisirang parte ng ating katawan. Dito ay agad din tayong nakababawi at nanunumbalik ang resistensya at lakas para kumilos muli na nasa ayon.

Pero alam n’yo ba na pati ang posisyon sa pagtulog ay may taglay ding kapakinabangan sa ating kalusugan? Kung tama ang posisyon natin sa pagtulog ay maayos nating nakukuha ang benepisyo nito.

Alamin natin ang mga ito…

Ang posisyon natin sa pagtulog ay maa­aring maging dahilan kung bakit mayroon tayong paghilik o kung bakit ito mas lumalala.

Ang posisyon din sa pagtulog ay daan upang magkaroon tayo ng heartburn o maging ang pagkakaroon ng kulubot sa mukha o wrinkles.

BACK SLEEPERS

back sleeperGood Effect: Kapag ang likod natin ay nakalapat habang tayo ay natutulog, nagiging mabuti ito sa ating gulugod at leeg dahil diretso itong nakaposisyon at hindi puwersado sa anumang pagbaluktot.

Mas maiging nakatihaya tayong natutulog lalo na kung walang ­unang nakahambalang sa likod maging sa likod ng leeg upang napananatili ang neutral position.

May cosmeting be­nefits din ang pagtulog sa ganitong posisyon. Kapag back sleepers tayo, ang hangin ay malayang nakararaan o dumadampi sa ating mga mukha, kaya naman naiiwasan din dito ang pangungulubot ng ating balat o facial wrinkles.

Bad Effect: Kung ikaw ay humihilik habang natutulog, ang posisyong ito ay hindi akma para sa iyo. Kung nahihirapan ka sa paghilik dahil sa sleep apnea, lalo lamang lalala ito kung patihaya kang nakahiga dahil ang likod na bahagi ng iyong dila ay nagku-collapse sa airways o daanan ng hangin (nagiging relaxed masyado ang dila kaya may pagharang na nangyayari sa hangin). Hindi kasi nakadadaloy ang hangin nang maayos sa bibig hanggang sa lalamunan at hanggang sa baga at pabalik sa mga ito. Kung may pagbara sa hangin nagkakaroon ng paghilik at kung mas matindi ang pagbara ay mas tumitindi rin ang ingay ng paghilik.

Sa puntong ito, ipinapayo lagi ng doktor na matulog nang patagilid lalo na kung talagang may sleep apnea.

SIDE SLEEPERS

side sleeperGood Effect: Ang pagtulog nang patagilid ay ang pinakapangkaraniwang posisyon ng pagtulog. Pero alam n’yo ba na mas may tamang posisyon din para rito?

Mas maiging matulog nang patagilid pero dapat ito ay sa kaliwa. Sa posisyon kasing ito nababawasan ang acid reflux at heartburn. Nakatutulong din ito para ma-boost ang panunaw ng ating sikmura at nagiging maayos din ang daloy sa drainage upang mailabas nang maayos ang toxins mula sa lymph nodes.

Maliban sa mga nabanggit, nakatutulong din ito para ang sirkulasyon ng dugo ay maging maayos at upang mailabas ng ating utak ang mga duming naririto.

Dahil sa anatomy o pagkakaporma at lokasyon ng ating organs, nakukuha lamang ang mga benepisyong ito kung ikaw ay matutulog nang patagilid at nasa kaliwang side.

Bad Effect: Ang posisyong ito ay hindi nararapat dahil nagkakaroon ng puwersa sa tiyan at baga kaya kailangang lumipat ng puwesto. Dapat lumipat ng puwesto lalo na kung nagsisimula nang maranasan ang pamamanhid ng braso sa mahabang oras.

May stress ding naibibigay ang posisyon sa pagtulog na ito kung talagang nakararamdam na ng pananakit sa balikat.

STOMACH SLEEPERS

stomach sleeperGood Effect: Kung ang posisyon ng pagtulog ay nakadapa, mas nagi­ging daan ito upang ang paghilik ay mabawasan. Iyan lang talaga ang madalas na tulong nito.

Bad Effect: Kung nakadapa tayo at naiipit ang tiyan, ito na siguro ang pinakamalalang posisyon sa pagtulog. Ito kasi ang sanhi upang ang natural curve (natural na pagkabaluktot) ng gulugod ay nagiging flat kaya matapos ang pagtulog ay nakararanas ng pananakit ng likod sa bandang ibaba.

At kapag nakadapang natutulog, natural ding ang leeg ay nakaposis­yon sa isang side lamang sa mahabang oras kaya kalaunan ay sumasakit din.

BOTTOM LINE

Ang pagtulog ay isang personal experience at nariyan sa posisyon na gusto natin ang pagiging ­kom­portable.

Sa mga posisyon sa pagtulog na nabanggit, nasa sa atin kung ano ang nakabubuti sa atin lalo na kung susubukan kung ano talaga ang mainam para sa atin o sa ating kalusugan.

Wala namang masama kung susubukan nating matulog sa ibang paraan naman o pupuwedeng paiba-iba sa iilang oras para malaman kung ano ang tama sa atin.

Please follow and like us:
Read More

SOCIAL MEDIA ANG MAY SALA

DPA

MULA nang nauso ang makabagong teknolohiya kasabay ng pagsulpot ng internet, napagaan ang buhay ng mga tao pagdating sa komunikasyon at malaki ang naitulong din nito sa negosyo at sa lahat ng sektor ng lipunan.

‘Yung mga dating nag-uusap lang sa pamamagitan ng sulat na dalawang linggong inaabangan ang pagdating ng mga nagdadala ng sulat sa bahay mo ay pwede nang mag-usap sa pamamagitan ng smart phone basta may data lang.

Ang overseas Filipino workers (OFWs) na hindi nakakausap ang kanilang pamilya kung hindi tatawag ay maaari na silang mag-usap nang live sa smart phone at magkumustahan kahit anong oras.

Wala nang pwedeng magtago dahil kahit saang sulok ka ng mundo ay puwede ka nang makontak ng mga kaanak mo, mga kaibigan na matagal nang walang komunikasyon sa ‘yo, basta may account ka sa social media platform tulad ng Facebook, Instagram, Twitter at kung anu-ano pa.

Maraming trabaho rin ang napagaan tulad ng trabaho ng mga mamamahayag dahil kung ang pagbabasehan ang kuwento ng mga journalist noong wala pa ang internet, nagpu-phone in lang sila ng kanilang istorya sa desk pero ngayon ay puwede mo nang ipadala ang istorya mo sa desk sa pamamagitan ng Yahoo, GMail at kung anu-ano pa.

Pero kung may mabubuti at magagandang idulot ng makabagong teknolohiya, mayroon ding masama tulad na lamang ang nangyayari sa ating mga kabataan ngayon na maagang mapaririwara dahil sa social media.

Kahit sino ay nababahala sa ulat ng Population Commission (PopCom) na 576 babies ang naipapanganak ng teenage moms at isa sa mga itinuturong dahilan dito ay ang social media.

Hindi na ito nakapagtataka dahil kahit wala pa sa tamang edad ay mayroon ng account sa social media at napapadali sa kanila ang makakilala ng kung sinu-sinong mga tao.

Idagdag mo pa riyan ang mga bawal na impormasyon na nakikita ng mga kabataan sa social media na naaaccess nila kahit anong oras kaya marami sa kanila ang naiimpluwensyahan at ginagawa nila ang mga nakikita nila.

Noong estudyante ako ay penpal lang ang uso pero bihira noon ang napapariwarang kabataan. Pero ngayon, nakakatakot na ang sitwasyon para sa mga pag-asang ito ng bayan dahil sa social media.

Panahon na siguro para higpitan ng mga magulang ang kanilang mga anak at tingnan kung sinu-sino ang kausap nila sa social media, baka ang mga ito ang magpahamak sa mga bata. (DPA/  BERNARD TAGUINOD)

Please follow and like us:
Read More

BANDALISMO SA MAYNILA

SIDEBAR

OPERASYON-PINTA o O-P ang terminong ginagamit ng mga aktibista sa pagpipintura ng mga islogan sa mga pader na gamit ang kulay pulang pintura bilang simbolo ng militansiya ng mga kabataan na nagsusulong ng pambansa-demokratikong pakikibaka.

Operasyon-Dikit naman o O-D ang tawag ng mga aktibista sa pagdidikit ng mga poster na kadalasan ay mag islogan ding isinulat sa pinturang pula sa mga lumang dyaryo at idinidikit sa mga poste at pader gamit ang nilutong gawgaw at ispongha.

Bahagi ng gawain ng mga aktibista ang O-P at O-D pero kahit pa sabihin nilang bahagi ito ng gawaing propaganda ay bandalismo pa rin ito sa mata ng mamamayan lalo na sa pananaw ng mga lokal na pamahalaan.

Kaya nga ganoon na lang ang galit ni Mayor Isko Moreno nang makita ang mga O-P sa pader ng Lagusnilad sa harap ng City Hall lalo pa’t bagong pintura pa lamang ang naturang lugar bilang bahagi ng beautification campaign ng lungsod.

Kung bakit ba naman kasi pinipili pa ng mga grupo gaya ng Panday Sining na mag-O-P sa mga lugar na bagong pintura at sila pa ang nangangatwiran na mas mahalaga ang mga isyung kanilang ipinipinta sa mga lugar gaya ng Lagusnilad.

Ito ang paliwanag ng grupong Panday Sining sa kanilang bandalismo: “To the public: Sorry for the inconvenience, but the matter and issues at hand are urgent. Left and right, ordinary people are being killed or jailed for criticizing this corrupt and fascist government. The space for peaceful and democratic speech is already being compromised by the regime as it pushes to criminalize dissent […] Repression is rampant amid worsening poverty, joblessness, and hunger brought about by the Duterte regime’s adherence to foreign, big businesses, and landlord interests.”

Makikita sa kanilang pahayag ang mga isyu na hindi lang sila ang nagdadala kundi ang ilan ding mga mga militanteng grupo na nabibilang sa pambansa-demokratikong bloke kung saan nagsisilbing umbrella organization ang Bagong Alyansang Makabayan (Bayan).

Pero ang hindi katanggap-tanggap sa kanilang pahayag ay ang sinasabing kawalan ng espasyo para sa mapayapa at demokratikong pagpapahayag.

Masasabing millennials ang bulto ng miyembro ng Panday Sining at bilang millennials ay sanay silang gumamit ng Social Media para ipalaganap ang kanilang organisasyon at mga prinsipyo nito at kung naniniwala sila sa kawastuhan ng kanilang mga ipinaglalaban, walang dahilan kung bakit hindi sila makakakuha ng maraming “likes” at “shares” sa kanilang “posts.”

Hindi puwedeng maikonsidera ang O-P bilang sining dahil islogan lang ‘yon. Mas mainam pa siguro kung kina­usap ng Panday Sining si Mayor Isko at nag-volunteer na gumawa ng magandang mural painting sa ilang bahagi ng Maynila kung saan puwede nilang ilabas sa mga mural ang kanilang mga isyu. (Sidebar / RAYMOND BURGOS)

Please follow and like us:
Read More

BACOOR RECLAMATION PROJECT PARA SA PROGRESO

FOR THE FLAG

Nakapagtataka naman kung bakit ang ingay ng ­ilang grupo laban sa reclamation project sa Bacoor City samantalang para sa progreso ito ng Cavite.

Una nang umangal si Sen. Cynthia Villar dito na makaaapekto raw sa kanyang Las Piñas-Parañaque Critical Habitat and Ecotourism Area Project samantalang wala namang pag-aaral na isinagawa upang ito ang maging konklusyon ng senadora.

Maganda sana ang proyektong iyan na gustong pangunahan ng Frabelle at Aboitiz, na tiyak na makikinabang ang mga Caviteño at mga karatig-lugar, ngunit winawasak ng ilang grupo.

Ngayon, ang DENR naman ay na-hostage dahil sa kanilang budget kaya ayun, lumambot sa ibig ng ilan.

Sa totoo lamang, walang basehan ang sinasabi ng senadora na babahain ang Las Piñas hanggang walong metro kung mapapayagan ang 944-hectare na reklamas­yon at ‘yun nga, maaapektuhan nga raw ang kanyang pet project.

Ang tanging basehan ni Sen. Villar ay ang sinabi ni dating DPWH Sec. Rogelio Singson na magbabaha nga sa Las Piñas kapag natuloy ang reklamasyon ngunit wala namang naiprisintang pag-aaral kung totoo ngang ganoon ang magiging resulta at kung tunay nga ba ang sinasabi ni Singson.

Naidadahilan pa ngayon ang mga mahihirap upang salungatin ang napakagandang proyektong ito, e matanong ko nga, sino nga ba ang mahirap?

Ano say mo, Mayor Lani Mercado? Ganun-ganun na lamang ba ‘yun? Paano naman ang mga Caviteño?

Moro-moro na naman ito, bayang magiliw! (For the Flag / ED CORDEVILLA)

Please follow and like us:
Read More

BOC-SAN FERNANDO WAGI

BOC-SAN FERNANDO

MATAGUMPAY na na­lampasan ng Bureau of Customs (BOC) Port of San Fernando ang target na koleksyon nito para sa buwan ng Oktubre ngayong taon.

Ito ay matapos makapagtala ng positibong 3.16 porsiyento na labis sa dapat na koleksyon na P276,361,480 ng Oktubre.

Sa tala ng BOC-San Fernando, lumabas ang aktuwal na koleksyon nito na P285,103,337 kung saan may labis na P8,741,857 sa kita.

Patuloy ang pagsisikap ng BOC na mapaganda pa lalo ang revenue collection sa pamamagitan ng pagpapatupad ng Post Clearance Audit Group (PCAG) na bahagi ng Customs Mo­dernization and Tariff Act (CMTA).

Sa patuloy na pagpapatupad ng mga reporma at programa upang mapaganda ang serbisyong pangkabuuan ng BOC, inaasahang hindi lang ang Port of San Fernando ang makakaabot ng target na koleksyon su­balit maging ang iba’t ibang ports sa bansa.     (Boy Anacta)

Please follow and like us:
Read More

BOC: KOMUNIKASYON, SAGOT SA MAGANDANG SERBISYO

Dialogue with BOC stakeholders

LAYON na maging malinaw sa lahat ang mga panuntunan at regulasyon ng kanilang tanggapan, nagsagawa ng dayalogo sa stakeholders,  importer at customs broker ang Bureau of Customs noong nakaraang buwan sa Cagayan de Oro, Cebu at Maynila.

Maliban sa panuntunan at proseso, tinalakay din sa pag-uusap ang National Value Verification System (NVVS) , Customs Accreditation at Accounts Management Office (AMO) kasabay ng pagbanggit sa BOC mo­dernization projects tulad ng Parcel and Balikbayan Box Tracking System.

Sa Port of Cagayan de Oro, dumalo ang animnapung (60) importers at customs brokers na nakikipag-transaksyon sa Ports of Surigao, Zamboanga, Davao at Cagayan de Oro.

Apatnapung (40) importers at customs brokers naman mula sa Port of Cebu, Port of Tacloban at Port of Iloilo ang dumalo sa dayalogo sa Cebu.

Habang iba’t ibang stakeholders mula sa iba’t ibang bahagi ng Maynila at mga kalapit na lalawigan ang dumalo sa dayalogo sa Maynila at nakiisa rin ang iba’t ibang kompanya at organisasyon.     (JO CALIM)

Please follow and like us:
Read More

PH BASEBALL TEAM: GIRL WONDERS NG BFA CUP  

BASEBALL

BINUO ng Philippine amateur Baseball Association ang pambansang koponan sa women’s baseball para dalhin ang bandera ng bansa sa darating na Southeast Asian Games na idaraos dito.

Hindi nakasama ang koponan sa ika-30 selebrasyon ng tuwing ikalawang taong palaro dahilan sa isyu ng teknikalidad.

Sa halip ay pinadayo sila sa Guangdong, China kung saan ay umani sila ng tagumpay at karangalang ni sila at ang kanilang mga opisyal ay di man pinangarap na kanilang matatamo.

Bumalik ang ating mga babaeng beysbolista noong Sabado na dala ang medalyang tanso tanda ng kanilang pagtatapos sa pangatlong puwesto sa BFA Women’s Cup bukod sa bonus na  pagkakataong katawanin  ang bansa sa World Cup na idaraos sa susunod na taon sa di pa inihahayag na lugar at petsa.

Makakasama ng ating mga dilag ang nag-kampeong Japan, Chinese Taipei at China na tulad nila ay umabante sa World Cup para kumatawan sa Asya.

Ang mga dilag ni coach Egay delos Reyes ay may pagkakataon ding makapuwesto sa world ranking bilang premyo sa panalo nila sa mga world-rated na koponang Hong Kong, 12-3 kasalukuyang pang-10, at ang pang-anim na South Korea, 14-7.

Kauna-unahang paglahok ng Pilipinas sa BFA Cup at, samakatuwid ay wala pang ranggo. Ganoon din ang China, subalit dahil tinalo ito ng mga Pilipina nang dalawang beses – isa sa Super Round of Eight at sa playoff para sa pangatlong puwesto – kung kaya’t mabibigyan lamang ang mga Tsino ng ranking pagkatapos ng Pilipinas.

Tumapos ang mga Pilipina na tinagurian ding “Giant Killer” at “Surprised Package”  ng torneo, na may naipong 3-2 panalo-talong kartada matapos ang limang laro sa likod ng mga Hapon  at pumangalawang Taiwanese.

Ang pagkatalo ng Pilipinas sa Japan, 2-17, at sa Chinese Taipei, 0-15, ang tanging naging  bahid sa record ng ating mga dilag.

“Our ladies performed above everyone’s expectations,” wika ni basketball great at ngayon ay PABA president Chito Loyzaga sa karangalang ibinigay ng ating mga dilag sa bansa.

“They deserve to continue with their training program in preparation for the World Women’s Baseball Cup next year,” anang pinakamatandang anak ni basketball “Great Difference” Carlos “Caloy” Loyzaga.

“We appreciate very much the continuous support of the PSC (Philippine Sports Commission),” he added. “But we hope to establish a long term partnership with generous institutions, which will embrace the great potential of our Philippine women’s baseball team.” (SALA SA INIT, SALA SA LAMIG / EDDIE G. ALINEA)

Please follow and like us:
Read More

P4.4-M ‘HOT’ SUGAR NAKUMPISKA NG BOC

HOT SUGAR

(Ni JOEL O. AMONGO)

NASABAT ng Bureau of Customs ang P4.4 mil­yong smuggled na asukal na nakalagay sa walong (8) containers noong Miyerkoles (Nob­yembre 13) sa Port of Manila.

Sinabi ng BOC, ang mga kontrabando na dumating sa South Harbor noong Agosto 30, 2019 mula China ay pawang Korach Conditioned Refined Sugar na itinago sa container na idineklara sa customs steel coil.

Inihayag ng BOC na RZTREC Trading, ang consignee ng asukal na kinumpiska sa bisa ng Warrant of Seizure and Detention (WSD) laban sa kargamento, ay sinampahan ng kasong  kaugnay sa paglabag sa Customs Modernization and Tariff Act (CMTA).

Samantala, inaasahan na dadagsa pa ang iba’t ibang kargamento sa mga daungan sa bansa kaugnay nang nalalapit na holiday seasons.

Matatandaan noong Oktubre 21, 2019, nasabat ng BOC-Port of Cebu ang apat na containers na naglalaman ng iba’t ibang mga gulay na mula sa China na idineklarang oranges na nagkakahalaga ng kulang-kulang P1 milyon.

Please follow and like us:
Read More

HANDOG NA PALUPA SA RIZALEÑONG MAGSASAKA

FORWARD NOW

Kaisa tayo ng Department of Agrarian Reform sa pamamahagi ng lupang sakahan para sa mga magsasakang walang sariling lupa na unang hakbang ng gobyerno upang mabago ang buhay ng mga benepisyaryo.

Sa kabuuan, 807 agra­rian reform beneficiaries (ARBs) mula sa Rodriguez, San Mateo, Teresa, Morong, Baras, Pililia, Jalajala, Tanay, at Pinugay – mga lugar na sakop ng Ikalawang Distrito ng Rizal, ang tumanggap ng kanilang Certificate of Land Ownership Awards para sa 737.0017 ektarya na lupang sakahan na ipinamahagi noong Setyembre at Oktubre.

Tiniyak din natin sa ARBs na ang suporta ng gobyerno ay hindi nagtatapos lamang sa pamamahagi ng lupa bilang pagtalima sa Comprehensive Agrarian Reform Program.

Babalangkas kami ng mga pamamaraan upang siguruhin na mapapakinabangan nang husto ng mga benepisyaryo ang lupa na kanilang natanggap. Magtutulungan kami hindi lang para maiangat ang buhay nila, kundi para na rin umusbong ang agrikultura sa ­aming distrito.

Inatasan na natin ang ating mga tauhan na makipag-ugnayan sa mga ahensiyang may kinalaman sa pagpapatupad ng Comprehensive Agrarian Reform Program kung ano pa ang karagdagang suporta na maaari nating ibigay sa farmer-beneficiaries.

Layunin natin na direktang ilapit ang serbisyo ng gobyerno sa mga benepisyaryo sa halip na dumulog ang mga ito kung saan-saan. Madalas kasi hindi na prayoridad ng magsasaka ang magtanong at lumapit sa pamahalaan para humi­ngi ng tulong. Nangangahulugan ito na hindi nila alam kung anong mga serbisyo ang pwede nilang makuha sa ating gobyerno.

Tutulungan natin ang farmer-beneficiaries na madaling makalapit sa credit facilities para magkaroon ng pondong magagamit sa pagpapaunlad ng ani at makabili ng kagamitan sa pagsasaka. Handa rin tayong magbigay ng technical assistance at magturo ng wastong pagpapatakbo sa pananalapi upang matiyak na ang kabuhayan ng mga magsasaka ay umasenso.

Ang pagbibigay ng mabilis na access sa pananalapi ay isang paraan upang hindi lumapit ang mga benepisyaryo sa mapagsamantalang nagpapautang o tuluyang mauwi sa pagbenta ng kanilang lupa.

Ang pagbubuklod ng mga ahensiya upang makabuo ng malakas, masigla at mapagkakatiwalaang mga organisasyon at pagpapakilala ng mga makabagong paraan upang mapataas ang kita ng mga magsasaka sa pamamagitan ng iba’t ibang proyekto ang siyang magdudulot ng malaking pagbabago o paglago.

Sa aking mga kalalawigang magsasaka, pag­yamanin natin ang handog na palupa.  (Forward Now / Rep. Fidel Nograles)

Please follow and like us:
Read More