Muli na namang nagsampa ng dalawang (2) kasong smuggling ang Bureau of Customs sa Department of Justice (DOJ) laban sa importers at custom brokers ng imported aluminum products, airsoft guns at accessories.
Isinampa ang criminal complaint laban sa Mega Precision Corporation at kanilang customs broker para sa umano’y importasyon ng undeclared 2,000 piraso ng aluminum profiles noong ika-16 ng Agusto, 2018 sa Port of Manila.
Ang nasabing kalakal ay tinatayang nagkakahalaga ng P821,461.69.
Ang Mega Precision Corporation at kanilang signing customs broker ay may paglabag sa Republic Act No. 10863, o mas kilala bilang Customs Modernization and Tariff Act (CMTA), at Article 172 na may kaugnayan sa Article 171 ng Revised Penal Code (RPC), bilang inamyendahan.
Isa pang criminal complaint ang isinampa laban naman sa VMP Trading dahil sa misdeclaration ng P1,303,329.76 halaga ng iba’t ibang airsoft guns at accessories.
Ang paglabag ay naganap noong ika-14 ng Disyembre, 2020 sa Manila International Container Port (MICP).
Ang labag sa batas na importasyon ng airsoft guns at accessories ay paglabag sa CMTA, at Section X ng PNP Circular No. 11-2007, o mas kilala bilang “Revised Rules and Regulations Governing the Manufacture, Importation, Exportation, Sale, Possession, Carrying of Airsoft Rifles/Pistols and Operation of Airsoft Game Sites and Airsoft Teams.”
Sa kasalukuyan ay 34 criminal cases na ang naisampa ng BOC laban sa tiwaling importers at customs brokers.
(Joel O. Amongo)
207 
