October 13, 2021 - SAKSI NGAYON

Drug test sa mga kawani WALANG ADIK SA BOC-CLARK

October 13, 2021 jake

SINORPRESA ng Bureau of Customs sa Port of Clark ang 20 kawaning isinailalim sa random drug testing bilang bahagi ng programang nagbibigay katiyakan na walang gumon sa ipinagbabawal na gamot sa hanay ng kanilang mga empleyado.

Katuwang ang Philippine Drug Enforcement Agency (PDEA) region III office, isinalang sa drug test ang mga kawani mula sa iba’t ibang tanggapan ng Port of Clark sa Pampanga. Kabilang sa isinailalim sa drug test bilang tugon sa direktiba ni Customs Commissioner Rey Leonardo Guerrero ay ang mga tauhan ng Enforcement and Security Service (ESS), Customs Intelligence and Investigation Service (CIIS), maging ang mga gwardya at mga contractual personnel ng nasabing puerto.

Mabilis din namang inilabas ang resulta ng pagsusuri – lahat negatibo, bagay na ikinalugod ni POC District Collector Alexandra Lumontad.

Gayunpaman, siniguro ni Lumontad na hindi pa doon nagtatapos ang kanilang paglilinis ng droga sa hanay ng mga opisyal at empleyado ng kawanihan, lalo pa aniya’t marami pang random drug testing ang isasagawa hanggang sa matiyak na drug-free ang kanilang district collection office.

“The Port of Clark will strictly adhere to the directives of the Commissioner in promoting a safe and healthy drug-free work environment. It is a must for us to make sure that the Port will remain a drug-free workplace,” aniya.

TAIWANESE NA 17-TAONG WANTED NABITAG NG BI

October 13, 2021 jp admin

QUEZON – Nalambat sa mga operatiba ng Bureau of Immigration (BI) ang isang Taiwanese national na wanted sa mga awtoridad sa Taipei dahil sa tangkang pagpatay sa kanyang kababayan, 17 taon na ang nakalilipas.

Ayon sa report kay Immigration Commissioner Jaime Morente mula sa BI’s Fugitive Search Unit (FSU), kinilala ang dayuhan na si Huang Kuan-I, 53, naaresto noong Lunes ng umaga sa bayan ng Real sa lalawigan ng Quezon.

Ang mga ahente na humuli sa dayuhan ay armado ng warrant of deportation na inisyu ni Morente matapos makatanggap ng impormasyon kaugnay sa pagiging wanted ni Huang sa Taiwanese authorities.

Si Huang ay may outstanding warrant na inisyu ng Hualien Prosecutor’s Office sa Taiwan noong 2004.

“Aside from being an undesirable alien, he will also be deported for being an undocumented alien because his passport already expired in February 2019 and has not been renewed since,” ani BI-FSU Acting Chief Rendel Ryan Sy.

Idinagdag pa ni Sy na si Huang ay overstaying na sa bansa na dumating noong Abril 2009 at tinakasan ang kanyang sentensiya sa kanyang ginawang krimen sa Taiwan.

“He fled to the Philippines a year before a Taiwanese judge sentenced him to eight years in prison for attempted murder,” ani Sy.

Ayon pa sa impormasyon na ibinigay sa BI, si Huang ay nasentensiyahan sa kasong pamamaril at seryosong pagkakasugat sa kanyang biktima sa Hualien, Taiwan noong 2004.

Si Huang ay kasalukuyan nakakulong sa BI warden facility sa Taguig City habang nakabinbin ang implementasyon ng kanyang deportasyon.

Siya ay ilalagay sa Immigration blacklist upang hindi na muling makapasok sa Pilipinas. (JOEL O. AMONGO)

8 WANTED PERSONS NALAMBAT NG PNP BICOL

October 13, 2021October 13, 2021 jp admin

SA gitna ng pangamba dulot ng banta ng COVID-19 pandemic, ang PNP Bicol, sa pamumuno ni P/BGen. Jonnel C. Estomo, Regional Director, PRO5, ay mas pinaigting ang kampanya kontra kriminalidad upang matiyak ang seguridad ng bawat Bicolano.

Noong ika-12 ng Oktubre 2021, nagsagawa ng anim na operasyon ang PNP Bicol sa ilalim ng ‘campaign against wanted persons’ na nagresulta sa pagkakahuli sa walong indibidwal.

Sa probinsya ng Albay, timbog ang rank 7 city most wanted person ng Ligao City sa bisa ng warrant of arrest sa kasong qualified rape na inisyu ng RTC Branch 12, Ligao City. Kinilala ang suspek na si Romeo Pedragosa Mijares Jr., 52-anyos.

Sa isla ng Masbate, dalawa ang nadakip ng mga awtoridad sa bisa ng warrant of arrest mula sa MTCC, Masbate City. Kinilala ang mga suspek na sina Jerome Montes y Malapaz, 27, at Ernie Montes y Manlapaz, 20, may kasong resistance and disobedience; paglabag sa RA 11332, at non appearance in court.

Dalawa naman ang magkasunod na inaresto sa Camarines Sur sa magkahiwalay na operasyon. Ang mga arestado ay sina Rommel Milla y Bagaporo, 31, may kasong paglabag sa RA 9165, at Sandy Egos y Bantog, inaresto sa kasong alarms and scandal.

Arestado rin ang 47-anyos na si Niña Veloso y Hosana, akusado sa kasong 2 counts ng estafa sa Daet, Camarines Norte.

Sa Sorsogon, timbog ang dalawang akusado sa kasong paglabag sa RA 8048 o Coconut Preservation Act of 1995 na inamiyendahan ng RA 10593, na kinilalang sina Francisco Correa y Gayta, 46, at Michael Escario y Escanilla, 25-anyos. (JESSE KABEL)

LIDER NG GUN FOR HIRE GROUP, TIMBOG

October 13, 2021 jp admin

BATANGAS – Natimbog ng mga awtoridad ang umano’y lider ng isang gun for hire group sa bayan ng Padre Garcia sa lalawigang ito.

Kinilala ang suspek na si Sulpicio Andal, 55, lider ng Andal gun for hire group na nag-o-operate sa lalawigan ng Batangas.

Si Andal ay inaresto sa ikinasang search warrant operation ng mga tauhan ng Provincial Intelligence Unit-Batangas PPO, OPD-Drug Enforcement Unit,
1st Batangas Provincial Mobile Force Company, Regional Mobile Force Battalion 403rd-A Maneuver Company, at Padre Garcia MPS sa bahay nito sa Barangay Maugat, Padre Garcia.

Nakuha kay Andal ang isang kalibre .45 na baril, mga magazine at bala nito.

Nasa kustodiya na ng Batangas PPO ang suspek at nahaharap sa kasong paglabag sa Republic Act 10591 (Comprehensive Firearms and Ammunition Regulation Act). (NILOU DEL CARMEN)

DREDGER VESSEL GAMIT SA RIVER QUARRY SILAT

October 13, 2021 jake

APARRI, Cagayan – Kumpiskado sa mga operatiba ng Bureau of Customs (BOC) – Port of Aparri ang isang dredger vessel na karaniwang gamit sa black sand quarry operations sa mga ilog at maging sa karagatan.

Sa rekomendasyon ng Customs Intelligence and Investigation Service – Manila International Container Port (CIIS-MICP), sinagasa ng mga tauhan ng BOC Aparri Enforcement and Port Operations kasama ang mga operatiba mula sa hanay ng Philippine National Police (PNP) Maritime Group ang maalong karagatan ng Aparri Delta kung saan naroon ang pakay ng operasyon – ang dredger vessel na MV Warrior 6.

Sa loob ng maraming taon, naging maugong ang illegal quarry operations sa nasabing lalawigan para sa black sand na diumano’y binibili ng bansang Tsina para gamitin sa kanilang ginagawang artificial islands sa pinag-aagawang West Philippine Sea.

Nang masipat ang pakay na dredger vessel, agad itong sinabat ng pinagsanib na pwersa ng BOC at PNP Maritime Group para ihain ang Warrant of Seizure and Detention order na nilagdaan ni BOC-Aparri District Collector Arienito Claveria sa barkong kinakatawan ni Felito Padayao na tumatayong kapitan ng sasakyang pandagat.

Nagsagawa na rin ng imbentaryo sa mga lulang kalakal ng MV Warrior 6 na nakapiit ngayon sa Cagayan River Offshores
habang inihahanda ang kaukulang kaso laban sa may-ari, operator at kapitan ng nasabing barko.

Isang kinatawan naman ng Sandraw Movers and Development Corporation ang nakipag-ugnayan sa BOC ay pormal na naghain ng manipesto ng pagmamay-ari ng nasabing barko.

Matagal ng problema ang black sand mining sa Cagayan sa kabila ng pagtutol ng mga residente ng nasabing lalawigan.

Ayon sa mga residente, inilalabas ng bansa at ibinebenta sa bansang Tsina ang mga nasabing black sand gamit ang Port Irene sa bayan ng Sta. Ana na kilalang bagsakan noon ng mga segunda-manong sasakyan.

Taong 2013 nang salakayin ng National Bureau of Investigation (NBI) at Mines and Geosciences Bureau (MGB) ang nasabing lalawigan bunsod ng reklamo sa malawakan at ilegal na pagmimina ng black sand ng mga negosyanteng Tsino. Labingwalo ang arestadong Tsino sa nasabing operasyon.
(JOEL AMONGO)

DOH kumontra OCTA: PWEDE NA ULING MAG-CHRISTMAS PARTY

October 13, 2021 jp admin

INAASAHANG makapagdaraos na muli ng Christmas Party ngayong Disyembre, ngunit ito ay para sa mga bakunado lamang, ayon sa OCTA Research Group.

“In places na vaccinated ‘yung attendees, kunwari sa office Christmas party na everyone’s vaccinated na, we can probably have a big Christmas party because the risk right now seems low,” ayon kay Dr. Guido David, miyembro ng OCTA.

Ito ay makaraan ang patuloy na pagbaba ng mga kaso ng COVID-19 sa bansa at pagluwag na ng healthcare facilities at isolation centers.

Ngunit hindi kumbinsido ang Department of Health (DOH) dito. Iginiit ni Undersecretary Maria Rosario Vergeire na kailangan pa rin ipatupad nang husto ang ‘minimum health protocols’ partikular ang pag-iwas sa matataong lugar at pagiging magkakadikit.

Handa naman umano ang DOH na mag-adjust sa sitwasyon ngunit nananatili ang palagiang pagtiyak sa kaligtasan ng lahat.

Hindi rin pabor dito ang pinuno ng Private Hospitals Association of the Philippines (PHAPi) na si Dr. Jose de Grano. Kung magkakaroon man ng Christmas parties, iginiit niya na posible na magkakadikit na miyembro ng pamilya lamang.

Kahit na lumuluwag na ang ‘occupancy’ ng mga ospital, ipinaalala niya na may problema ngayon sa tauhan dahil sa pag-alis ng mga healthcare worker patungo sa ibang bansa. (RENE CRISOSTOMO)

METRO CEMETERIES 5-ARAW ISASARA

October 13, 2021 jp admin

NAGKAISA ang Metropolitan Manila Development Authority (MMDA) at mga alkalde ng National Capital Region na irekomenda ang pansamantalang pagsasara sa lahat ng sementeryo at public memorial parks para maiwasan ang pagsipa ng COVID-19 cases bago at sa panahon ng All Saints’ Day at All Souls’ Day.

Inaprubahan ng Metro Manila Council, kinabibilangan ng MMDA at 17 alkalde ang isang resolusyon na nag-uutos sa local government units ng rehiyon na isara ang mga sementeryo ng limang araw mula Oktubre 29 hanggang Nobyembre 1, All Saints’ Day, at Nobyembre 2, All Souls’ Day.

“It is encouraged that individuals visit the public and private cemeteries, memorial parks and columbaria on dates earlier than October 29, 2021, or later than November 2 subject to the prescribed 30 percent venue capacity,” ang nakasaad sa resolusyon.

“As for the conduct of wakes, necrological services, funerals, interment, cremation and inurnment during the five-day period, the prescribed guidelines by the Inter-Agency Task Force for the Management of Emerging Infectious Disease shall govern,” ayon pa rin sa resolusyon. (CHRISTIAN DALE)

Nagagamit lang sa scam CONTACT TRACING LOGBOOKS ITIGIL

October 13, 2021 jp admin

MASUSING pinag-aaralan ng Department of Interior and Local Government (DILG) ang pagbabawal sa paggamit ng logbooks para sa contact tracing matapos na makatanggap ng ulat sa umano’y “smishing.”

Ayon kay DILG Undersecretary at Spokesperson Jonathan Malaya, makikipag-ugnayan sila sa National Privacy Commission (NPC) kaugnay ng posibilidad na tuluyang ipagbawal ang mga logbook bilang tugon sa data privacy act.

“Kasi marami na nga po tayong insidente ng ‘smishing,’ so kailangan po natin maging mapanuri sa mga panahon na ito,” pahayag pa ni Malaya, sa isang interview.

Nauna rito, nagpalabas ng abiso ang NPC hinggil sa ‘smishing,’ na pinagsamang salitang SMS (short messaging service) at phishing, na ginagamit ng ilang tiwaling indibidwal upang makapanloko ng kanilang kapwa.

Sa smishing, nagpapadala ang mga fraudsters ng text messages na nagkukunwaring mula sa mga respetadong kumpanya, upang linlangin ang ilang indibidwal para ibunyag ang kanilang personal na impormasyon, gaya ng kanilang passwords o numero ng credit card upang pagnakawan ang mga ito.

Aniya, maaaring nakukuha ng mga naturang tiwaling indibidwal ang phone numbers sa logbooks na pinapipirmahan sa mga tao, bago sila pumasok sa mga establisimyento gaya ng mga malls, restaurants at iba pa.

“Hindi na po kailangan gumamit ng mga logbook, kasi baka mamaya yung mga nilalagay nating datos sa log book ay ginagamit ng kung sino-sino para sa kung anong paraan,” paliwanag pa ni Malaya.

At para maiwasan ito, dapat na magbigay na lamang ang mga establisimyento ng hiwalay na forms o tumanggap ng digital contact tracing applications gaya ng StaySafe app upang makatiyak na hindi nakikita ng iba ang mga impormasyong inilalagay roon. (LILY REYES)

BLUE-SEAL NATISOD SA ZAMBO

October 13, 2021 jake

HINDI nakalusot sa masigasig na paglalayag ng Enforcement and Security Service (ESS) ng Bureau of Customs (BOC) sa karagatang sakop ng Zamboanga ang tangkang pagpupuslit ng mga smuggled na sigarilyo sa gawing timog ng bansa.

Sa pagtataya ng BOC, aabot sa halagang P4.8 milyong halaga ng imported na sigarilyong lulan ng dalawang bangkang de motor ang nasabat ng ESS kasama ang mga operatibang mula sa hanay ng Philippine National Police (PNP) 2nd Zamboanga City Mobile Force Company.

Kumpiskado rin ang dalawang bangkang de motor kabilang ang MV Mernalyn Z na kilala sa timog bilang “Jungkong.”

Unang naharang ang MV Mernalyn Z kung saan tumambad ang humigit kumulang 50 master bases ng iba’t ibang tatak ng mga blue-seal na sigarilyo.

Sa pagpapatuloy ng pagpapatrolya, nahagip din ang isa pang sasakyang pandagat na naglululan naman ng mas malaking kargamento – 87 master cases ng mga imported na yosi.

Sa kabuuan, 137 master cases ng smuggled cigarettes na lulan ng dalawang sasakyang pandagat. Nahaharap naman sa kasong paglabag ng Customs Modernization Act ang may-ari ng kargamento at maging ang operator ng mga kumpiskadong bangkang de motor.
(JOEL AMONGO)