CAVITE – Patay ang isang 53-anyos na lalaki makaraang saksakin ng nakababatang kapatid dahil sa paggamit ng biktima sa bluetooth speaker ng suspek nang hindi nagpapaalam sa bayan ng Tanza noong Linggo ng gabi.

Isinugod sa Tanza Specialist Medical Center ang biktimang si Michael Verde Flor Bustillos, subalit idineklarang dead on arrival.

Arestado naman ang suspek na si alyas “Miegene”, 49, nakababatang kapatid ng biktima.

Ayon sa ulat, dakong alas-7:00 ng gabi, hinanap ng suspek ang kanyang bluetooth speaker nang hindi nito makita sa loob ng kanilang bahay.

Nang makita ng suspek na ginagamit ito ng kanyang kuya ay sinita nito ang huli na nagresulta sa kanilang mainitang pagtatalo.

Hanggang sa kumuha ng patalim ang suspek at inundayan ng saksak ang biktima.

Hindi umabot nang buhay sa ospital ang biktima habang agad namang nadakip ng mga awtoridad ang suspek. (SIGFRED ADSUARA)