IIMBESTIGAHAN din ng Bureau of Customs (BOC) ang luxury vehicles na isinuko ni dating DPWH Bulacan Assistant District Engineer Brice Ericson Hernandez sa Independent Commission for Infrastructure (ICI).

Sinabi ni Customs Deputy Chief of Staff of the Office of the Commissioner Atty. Chris Bendijo, bukod sa dating opisyal, magsasagawa rin sila ng imbestigasyon sa iba pang mga empleyado ng DPWH sa Bulacan.

Ayon pa kay Atty. Bendijo, kasalukuyan ding sinusuri ng bureau ang mga tugon ng ilang kawani ng ahensya na nabigyan ng show cause order hinggil sa isinasagawang imbestigasyon sa mga mamahaling sasakyan na nauugnay sa maanomalyang flood control projects ng pamahalaan.

Nilinaw ng opisyal na iniimbestigahan lamang nila ang items na sangkot sa importasyon.

Matatandaan na itinurn-over ni Hernandez sa ICI ang dalawa niyang luxury vehicles — isang black GMC Yukon Denali sports utility vehicle (SUV) at Lamborghini Urus na milyon-milyon ang halaga.

(JOCELYN DOMENDEN)