MAS pinaigting ng Quezon City Police District (QCPD), sa pamumuno ni PBGen. Randy Glenn Silvio, ang kampanya laban sa pagnanakaw, partikular ang “basag-kotse” modus operandi, sa pamamagitan ng sustained at focused police operations.
Sinabi ng QCPD, mula Enero 2025 hanggang Pebrero 2026, nakapagtala ang QCPD ng kabuuang 20 kaso ng “basag-kotse”. Sa mga ito, 11 kaso ang nalutas, walo ang na-clear, at ang isa ay nananatiling nasa ilalim ng imbestigasyon.
Ayon sa QCPD, ang mga pagsisikap na ito ay humantong sa pagkakaaresto sa 10 indibidwal na sangkot sa nasabing ilegal na aktibidad.
Isa sa mga kamakailang nagawa sa panahong ito ay ang matagumpay na hot pursuit operation na isinagawa ng Pasong Putik Police Station (PS 16). Ang operasyon ay nagresulta sa pagkakaaresto sa dalawang suspek na sangkot sa isang “basag-kotse” na insidente dakong alas-3:55 ng madaling araw noong Pebrero 17, 2026, sa harap ng tirahan ng biktima sa Barangay Kaligayahan, Novaliches, Quezon City.
Alinsunod sa mga pagsisikap na ito, pinaalalahanan ng QCPD ang publiko na manatiling mapagbantay at magsagawa ng mga hakbang sa pag-iwas sa nasabing modus, tulad ng pag-iwas sa pag-iiwan ng mahahalagang bagay sa loob ng mga sasakyan, pagparada sa maliwanag at ligtas na mga lugar, at agarang pag-uulat ng mga kahina-hinalang tao o aktibidad sa pinakamalapit na istasyon ng pulisya o sa pamamagitan ng E911/QC Helpline 122.
“Nananatiling matatag ang QCPD sa pagpapaigting ng kanilang pagsusumikap laban sa kriminalidad, partikular ang laban sa mga pakana ng pagnanakaw tulad ng ‘basag-kotse,’ sa pamamagitan ng patuloy na operasyon ng pulisya, pagtaas ng visibility, at pagpapalakas ng koordinasyon sa komunidad upang protektahan ang publiko at bawasan ang mga pagkakataon para sa kriminal na aktibidad,” sabi ni PBGen. Silvio.
(PAOLO SANTOS)
45 
