Pinangunahan ni Bulacan Vice Governor Alex Castro kasama si Pulilan Mayor RJ Peralta ang ribbon-cutting ceremony sa pagbubukas ng ika-13 Pulilan Mandala International Art Festival sa SM Center Pulilan nitong Biyernes, Mayo 8. Kasama rin sa larawan sina organizer Andrew De Guzman, Vice Mayor Atty. Imee Cruz, SM Regional Operations Head Ana Datu, DOT Region III Director Dr. Richard G. Daenos, at UP Cebu Fine Arts Studio Arts Program Prof. Dennis “Sio” Montera. (ELOISA SILVERIO)

NAGTIPON ang hindi bababa sa 120 visual artists mula Gitnang Luzon at iba’t ibang bansa para sa pagbubukas ng ika-13 Pulilan Mandala International Art Festival sa SM Center Pulilan nitong Biyernes, Mayo 8.

Kabilang sa mga lumahok ang mga artist mula Australia, India at France sa masiglang pagdiriwang ng sining na tampok ang mga eksibisyon, lecture, public art, pagtatanghal, film showing, cultural rituals at community-based artistic collaborations.

Pinangungunahan ang taunang festival ng JEFARCA Arts and Historical Society Inc. sa suporta ng lokal na pamahalaan ng Pulilan, pamahalaang panlalawigan ng Bulacan, National Commission for Culture and the Arts (NCCA), at SM Center Pulilan.

Dumalo sa pagbubukas sina Department of Tourism Region III Director Dr. Richard G. Daenos, Bulacan Vice Governor Alex Castro, Pulilan Mayor RJ Peralta, Vice Mayor Atty. Imee Cruz, UP Diliman College of Fine Arts Dean Prof. Toym Imao, UP Cebu Fine Arts Studio Arts Program Prof. Dennis “Sio” Montera, SM Regional Operations Head-AVP for Mall Operations Ana Datu, at organizer na si Andrew De Guzman.

Ayon kay Vice Governor Castro, mahalagang pagkakataon ang festival upang maipakita ang talento at mayamang kultura ng mga Bulakenyo.

“Ang Pulilan Mandala International Art Festival ay nagsisilbing inspirasyon hindi lamang sa ating mga kababayan kundi maging sa mga panauhin mula sa iba’t ibang bahagi ng bansa at mundo,” ani Castro.

Sinabi naman ni Mayor Peralta na layunin ng pagdiriwang na bigyang pagkakataon ang mga artist, kabataan at malikhaing mamamayan na maipakita ang kanilang talento at pananaw.

Tatagal ng tatlong araw ang aktibidad na magtatampok ng art exhibits, mural painting, lectures, documentary film showing, sculpture unveiling, artists’ forum at music sessions.

Kabilang sa tampok na eksibit ang “Demetrio Diego: Modernism Rooted in Tradition” at “Rice, Ritual, and Region.”

Taglay ng festival ang temang “Art, Earth, Action” na nakatuon sa pagkamalikhain, sustainability, cultural heritage at collective responsibility.

Itinatag noong 2012 sa pakikipagtulungan ng NCCA sa pamamagitan ng National Committee on Visual Arts, lumawak na ang festival lampas sa Gitnang Luzon at Pilipinas at ngayong taon ay unang tumanggap ng international artists.

Tatagal hanggang Mayo 31 ang Pulilan Mandala International Art Festival exhibit sa SM Center Pulilan.