Ang sinasabi ng mga kritiko na lalong bumabaha ang shabu sa bansa ay maling pagtingin. Nahuhuli lamang po ngayon at nababalita ang laki ng volume ng mga nakukumpiskang shabu, hindi katulad noon sa mga nakaraang administrasyon na walang nahuhuli kaya wala ring nababalita.

Ito ay dahil na rin sa seryosong pagpapatupad ng administrasyon sa drug war nito na unti-unting lumalagas sa mga masamang elemento sa bansa, kasama na ang mga criminal, pusher at mga drug lord.

Katunayan, sumikat ang Pangulong Rodrigo Roa Duterte sa buong mundo dahil sa kanyang mahigpit na pagpapatupad ng digmaan kontra droga.

Kaya naman maaalalang na-intercept ng mga awtoridad ang may P6.4 bilyong halaga ng shabu shipment noon na kinasangkutan ng mga ismagler sa isang ahensya ng pamahalaan. Ito ay dahil na rin sa tip na mula sa mga awtoridad ng Tsina. Dahil sa kredibilidad ng administrasyon sa pagpuksa nito ng droga sa bansa ay hindi nangingimi ang mga taga-ibang bansa na maki­pagtulungan sa Pilipinas.

Ilang shabu laboratory na rin na nagpu-produce ng multi-bilyong pisong shabu at ecstasy ay na-raid at na-dismantle na ng pamahalaan.

May mga heneral, alkalde, iba pang lokal na mga opisyal kasama na ang barangay chairmen na sangkot sa droga ang tinututukan ng administrasyon, kaya naman ang pagsasabing ang shabu epidemic sa bansa na isang health problem lamang ay isang malaking kamalian.

Ibig sabihin, bukod sa health problem ang shabu epidemic, ay isa rin siyang systemic na suliranin na ang layunin ay gawing narco-country ang Pilipinas.

Lahat na ay ginagawa ng international drug syndicate upang maipasok ang shabu at iba pang droga sa bansa katulad ng pagpapalutang sa karagatan na hinihinalang kagagawan ng nasabing international drug ring na nag-ooperate sa may border ng Thailand, Laos at Myanmar.

Positibo tayo na sa pagtutulungan ng lahat ng Filipino at pagsasanib-pwersa ng iba’t ibang bansa laban sa droga, at sa natamong kredibilidad ng Pilipinas sa digmaan nito kontra droga, hindi malayong maubos ang mga nagsisilbing source ng shabu sa bansa. (For the Flag / ED CORDEVILLA)