NANGANGANIB na maapektuhan at bumaba pa ang foreign direct investments (FDIs) sa bansa dahil sa pagrepaso ng pamahalaan sa mga kontrata ng water concessionaires Manila Water at Maynilad, ayon sa Management Association of the Philippines (MAP).

Sinabi ng MAP na ito’y dahil nakaaapekto ang ‘regulatory risk’ sa paghikayat ng bansa sa mga investor, na hindi makabubuti sa ekonomiya.

Sa ika-71 inaugural meeting ng MAP kamakailan, binigyang-diin ng bagong pangulo ng grupo na si Francis Lim, na ang hakbang ng gobyerno na repasuhin ang water concession agreements ay may epekto sa kasalukuyang pagtingin sa Pilipinas bilang  investment destination.

Ani Lim, batay sa Fitch Solutions, ang bansa ang may pinakamataas na ‘regulatory risk’ sa kasalukuyan dahil sa pagrebyu sa water contracts.

Paliwanag ni Lim, ang FDIs ng bansa ay bumababa kung saan mula $10.3 billion noong 2017 ay bumagsak ito sa $9.8 billion noong 2018. Inaasahan aniyang bubulusok pa ito sa $6.9 billion sa 2019.

Ang FDIs ng bansa ay maliit din umano kumpara sa ibang bansa sa Southeast Asia tulad ng Vietnam na may $20.4 billion at Indonesia na may $24 billion noong nakaraang taon.

“Unless we in the Philippines shape up, foreign investors will view us as an unworthy investment destination and they might rather put their money in our Asean (Association of Southeast Asian Nations) neighbors,” dagdag pa niya.

Ang pamahalaan ay nag-aalok ng bagong kontrata sa dalawang water firms para masiguro umano na hindi na ito naglalaman ng hindi makatarungang mga probisyon na makasasama sa gobyerno at publiko.

Ang water concession deals ay binuo noon pang 1997 (panahon ni Fidel Ramos) na tatagal hanggang 2022 at pinalawig ng MWSS hanggang 2037 noong 2009 (panahon ni Gloria Macapagal-Arroyo). Gayunman ay binawi ang extension ng concession agreement dahil sa umano’y ‘onerous’ provisions na nakapaloob dito. SAKSI NGAYON NEWS TEAM