MULING ipinamalas ni Stephan Schrock ang pagiging beterano matapos ang game-winning kick at akayin ang Ceres Negos FC sa 1-0 win kontra Port FC, Martes ng gabi sa PAT Stadium sa Bangkok, Thailand.

Isang panalo pa at maibubulsa na ng Ceres ang AFC Champions League spot.

Umiskor si Schrock sa 51st minute, mula sa likurang bahagi ng net matapos mabigo si Port FC goalkeeper Worawut Srisupa na maitaboy ang bola.

Ang Busmen ay umabante sa third at final match ng preliminary stage laban sa FC Tokyo sa Enero 28 sa Ajinomoto Stadium sa Tokyo, para selyuhan ang puwesto sa group stage ng AFC Champions League.

Ito ang ikalawang panalo ng Ceres Negros FC matapos talunin ang Shan United FC, 3-2 noong nakaraang Linggo sa Rizal Memorial Football Stadium.

Instrumento rin sa panalo ng Busmen si Takashi Odawara sa mahigpit nitong depensa sa second half kung saan nagawa niyang pigilan si Port striker Sergio Gustavo Artegga para protektahan ang goal ng Ceres. (VT ROMANO)