SURIGAO del Sur – Nadakip sa inilunsad na law enforcement operation ng Armed Forces of the Philippines at Philippine National Police ang itinuturong utak ng New People’s Army sa inilulunsad na kidnapping at arson operation sa lalawigang ito.

Sa ulat na ipinarating ni Philippine Army chief, Lt./Gen, Gilbert Gapay kay AFP chief of staff Gen Felimon Santos, nasakote sa isinagawang AFP Law Enforcement Support Operations si Gloria Campos Tumalon, umano’y communist NPA terrorist (CNT) mastermind at lider ng CNT-linked group, MalahutayongPakigbisog Alang sa Sumusunod (MAPASU).

Si Tumalon ay nadakip ng AFP-PNP law enforcement operatives sa bisa ng bitbit nilang warrant of arrest sa kasong kidnapping and serious illegal detention sa Purok 4, Barangay Diatagon, Lianga ng nasabing lalawigan.

Si Gloria Campos Tumalon, alyas Bae Glo, ay may standing warrants of arrest sa kasong arson, kidnapping and serious illegal detention at destructive arson mula sa RTC Bayugan City, ay kapatid ni Pablito Sinzo Campos, CNT leader na nahuli sa Sibagat, Agusan del Sur noong 2018, at Emelda Campos Belandres, isa pang CNT mastermind na nasa wanted list.

Si Campos-Tumalon ay sinasabing sangkot din sa paghahasik ng karahasan sa Diatagon na ikinasugat ng isang sibilyan sa Sitio Emerald nito lamang nakalipas na buwan at sa bigong pananambang sa mga tropa ng pamahalaan sa Sitio Simuwao (Kilometer 9). (JESSE KABEL)