SPORT FEATURE Ni EDDIE ALINEA

NAGSIMULA ang ­problema ni Muhammad Ali nang dumating siya sa Maynila noong ­Setyembre 13, 1975 para ipagtanggol ang kanyang world heavyweight title laban sa challenger na si Smokin’ Joe Frazier.

Sa halip maipagtanggol ang korona, naunang nawala ang kanyang maybahay na si Belinda Boyd (Khalila) ilang araw bago ang nakatakdang laban noong Oktubre 1 ng nasabi ring taon.

Hiniwalayan ni Belinda si Ali nang isama nito ang kalaguyong si Veronica Porche sa Maynila. Madalas magkasama ang magsing-irog sa mga sosyalan at mga piging.

Lumala ang gawak sa buhay may-asawa ni Ali nang magbigay galang sila ni Frazier kina ­Pangulong Ferdinand Marcos at Unang Ginang Imelda Romualdez-Marcos sa Palasyo ng Malakayang.

Kasama si Veronica sa Palasyo kung saan ­ipinakilala ito ni Louisville Lip sa Pangulo bilang kanyang misis na ikinagulat ng American media na nakakaalam na hindi ito ang kanyang maybahay.

Natural na pinagpiyestahan ng media ang nangyari na nauwi sa isang malaking iskandalo. Naglabasan ang balita sa lahat ng mga pahayagan, napanood sa telebisyon at narinig sa radyo sa buong mundo ng sumunod na araw.

Wika ng isang reporter, mas nahigitan pa nito ang nalalapit na laban nina Ali at Frazier.

Nabalitaan din ito ni Belinda na sa matinding kahihiyan ay agad bumili ng plane ticket papuntang Pilipinas. Nang dumating siya sa Manila International Airport ay dumiretso siya sa Manila Hilton (ngayon ay Holiday Inn) na tinutuluyan ni Ali.

Nagulat ang lahat ng nasa silid ng kampeon na noon ay nagdaraos ng impromptu press conference, nang walang kaabog-abog na pumasok si Belinda at umuusok ang bibig na pinagmumura at pinagsisigawan ang asawa.

Labas lahat ng nasa kuwarto, kasama ang mga miyembro ng media na wala nang narinig kundi ang kalabugan ng mga nababasag na gamit na duda namin ay ipinupukol ni Belinda sa kanyang kabiyak.

Pagkatapos ng away, agad ding lumabas si Belinda, kumuha ng ­sasakyang papunta sa airport at lumipad pabalik sa Estados Unidos ng araw ding iyon.

Hindi pa nagaganap ang laban, na tinawag na “Thrilla In Manila,” nabalitang nag-file sa korte ng divorce si Belinda.

Nalaman ng inyong lingkod sa isang kasama sa kampo ni Ali, si Veronica pala ay nakilala ng kampeon sa Africa sa laban niya kay George Forman at mula noon ay kasa-kasama na sa mga biyahe nito sa iba’t ibang bansa.

Lumabas pa ngang panalo si Belinda, pangalawang asawa ni Ali kung kanino ay may apat siyang supling, sa ­nangyaring gulo. Ito ay matapos ­igawad ng korte ang ­milyon-milyong halaga ng bahay na tinitirhan nilang mag-iina, bukod pa sa buwanang sustento.