IPINAWALANG bisa ng korte sa Batangas ang search warrant na ginamit ng mga pulis sa isa sa serye ng mga raid laban sa mga aktibista na tinaguriang “Bloody Sunday” operations na nagresulta sa pagkamatay ng siyam na unyonista noong Marso 7.
Sa inilabas na order noong Oktubre 25, at ini-release sa media nitong Lunes, pinawalang bisa ng Tanauan City Regional Trial Court Branch 6 ang search warrant laban kay Erlindo “Lino” Baez, spokesperson ng Bagong Alyansang Makabayan (BAYAN) Batangas chapter.
Dinismis din ng korte ang kasong illegal possession of firearms and explosives laban kay Baez.
Si Baez ay hindi kasama sa mga napatay sa “Bloody Sunday” raids.
Wala ito sa kanyang bahay nang ihain ang search warrant ngunit sinampahan din kasong illegal possession.
Base sa pahayag ni Tanauan Court Judge Jose Ricuero Flores sa kanyang order, “The court so holds that the search warrants issued by Honorable Jason Zapanta, Presiding Judge, Manila Regional Trial Court Branch 74, to be null and void.”
“Accordingly, the informations against accused Erlindo Baez are hereby quashed and the cases against him are dismissed. The Tanauan City Police Station is hereby directed to immediately release Baez from custody/detention unless he is being detained for some other legal reasons,” ayon pa sa nakasaad sa order.
Ayon pa sa Tanauan court, sinasabi lamang sa search warrant ni Manila Judge Zapanta na “Barangay San Vicente, Sto. Tomas, Batangas” at hindi partikular na tinukoy ang bahay ni Baez.
Wala ring record na nagtanong si Judge Zapanta ng probing questions sa mga pulis nang mag-apply sila para sa warrant.
“It is therefore clear that the subject search warrants failed to specifically and sufficiently describe the place to be searched,” ayon pa sa Tanauan court kung saan binanggit din nito na ang isang search warrant ay dapat palaging sumunod sa konstitusyon. (NILOU DEL CARMEN)
205 
