ISANG tawag mula mismo sa Pangulo ng Estados Unidos ang tinanggap kahapon ni incoming President Ferdinand “Bongbong” Marcos Jr. Ang pakay – pagbati sa tagumpay sa katatapos pa lamang na halalan, kasabay ng pahayag ng suporta sa bagong administrasyon.

Ayon kay Ambassador Jose Manuel Romualdez, personal na tumawag si US President Joe Biden bandang alas 9:00 ng umaga kahapon kay Marcos sa hangaring palakasin ang ugnayan sa pagitan ng dalawang estado.

“It was a very good conversation. Biden reassured Marcos Jr. that we, the US, would like to work with him and continue our relations,” ani Romualdez.

Bukod sa pagbati sa tagumpay ni Marcos, binigyang kasiguruhan din umano ni Biden ang patuloy na suporta ng Estados Unidos sa post-pandemic recovery program ng susunod na administrasyon.

“He said we will work together amid pandemic and we will continue to value our relationship and continue to strengthen our democracy.”

Bilang tugon, nagpahayag naman ng pasasalamat ang susunod na Pangulo ng Pilipinas kay Biden na aniya’y kanyang hinahangaan sa larangan ng pakikipag-ugnayan sa iba’t ibang bansa – kabilang ang Pilipinas na kinokonsiderang kaalyado sa loob ng mahabang panahon.

Dagdag pa ni Romualdez, tiniyak din ni Biden ang pagpapadala ng kanyang kinatawan sa araw ng inagurasyon ni Marcos sa Hunyo.

“Biden said thank you and of course we don’t know if he would attend, but most likely they will send a delegation,” aniya.

Bago pa man ang tawag ni Biden, una nang binati ni US Secretary of State Antony Blinken si Marcos.

“We look forward to working with President-elect Marcos to strengthen the enduring alliance between the United States and the Philippines,” ani Blinken.

Samantala, sinuklian naman ni Atty. Vic Rodriguez ang mensahe ni Blinken.

“What I can tell you, you can expect and look forward to a better relationship with our long-time partner and ally in the United States and the foreign policy of president-elect Bongbong, it will be inclusive.”