CAGAYAN – Huli ang isang ranking executive committee member ng Communist Party of the Philippine armed wing New People’s Army, sa inilunsad na joint AFP at PNP operation sa Barangay Bulala, sa bayan ng Camalaniugan, sa lalawigang ito.

Ayon sa ulat na ipinarating ng Northern Luzon Command na pinamumunuan ni Lt. Gen. Ernesto Torres, sa punong himpilan ng Philippine Army, nagkasa ng joint law enforcement operation ang PNP at 77th Infantry Battalion sa Barangay Bulala, Camalaniugan, Cagayan.

Bandang alas-9:30 noong nakaraang linggo, armado ng mandamiento de arresto na inilabas ni RTC Presiding Judge Edmar Pascual Castillo Sr. ng Branch 11, Tuao, Cagayan, with no bail recommended, sinalakay ng 4th Maneuver Platoon ng 2nd Cagayan Provincial Mobile Force Company, Camalaniugan Municipal Police Station, Regional Mobile Force Battalion, 2nd PNP Special Action Force at 77th Infantry Battalion Philippine Army, ang pinagtataguan ng target na NPA medic at political leader.

Kinilala ni Philippine Army Commanding General, Lt. Gen. Romeo Brawner ang target ng operation na si Rosielyn Simeon, 34, alyas “Jinky/Eya/Lara/Di/Diya”.

Ayon kay Brawner, si Simeon ay Executive Committee member at isang armorer ng Giyang Pulitikal na nag-o-operate sa probinsya ng Cagayan.

Ang suspek ay nahaharap sa kasong illegal possession, manufacture, and acquisition of firearms, ammunition, and explosives sa ilalim ng Presidential Decree 1866. (JESSE KABEL)