MAKARAAN ang historic performance sa World Athletics Championships, may bagong misyon si Olympian pole vaulter Ernest John “EJ” Obiena.
Ibinulsa ni Obiena ang kauna-unahang bronze medal ng Pilipinas mula sa torneo na ginanap sa Eugene, Oregon at nagtala ng panibagong Asean record sa pole vault na 5.94m.
Hawak niya rin ang dating 5.93m Asian record, na naitala niya sa Golden Roof Challenge sa Innsbruck, Austria noong nakalipas na taon.
Ngayon ay target naman niyang makapag-uwi ng Olympics medal at mapabilang sa elite 6-meter club.
“There are a lot of things I want to do in the sport. I’m still happy to win the bronze medal but missing six meters is like…yeah. There’s something I need to do,” pahayag ni Obiena sa local sports media via Zoom. “There’s only 24 people who have reached the 6-meter mark, I want to be the 25th.”
Tinangka niyang maabot ito sa Oregon ngunit sumablay sa tatlong pagtatangka.
Inamin naman ni Obiena, mahirap talunin ang world record holder na si Armando Duplantis ng Sweden, gold winner din sa naturang torneo.
Gayunpaman, hindi siya sumusuko sa pangarap na maging unang Pinoy sa track and field na makapag-uwi ng Olympics medal, mula nang maka-bronze si Miguel White sa 400m hurdles noong 1936 Berlin edition.
Ayon kay Obiena, kailangan niyang mag-level up pa upang makasabay sa mga karibal na sina Duplantis, nagtala ng bagong world record 6.21m sa Oregon, at Amerikanong si Christopher Nilsen na nakaagaw niya sa silver medal sa kaparehong 5.94m jump.
“That’s the plan. That’s definitely what I want to achieve. Mondo (Duplantis) is definitely a force to be respected, to be reckoned with and Chris (Nilsen) is a competitor and everybody else in the field so if it’s going to be a medal, that I can’t say. Hopefully it will be a better case in Paris,” sabi ni Obiena.
Matapos ang World Athletics, naghahanda naman ang Southeast Asian Games back-to-back gold medalist na sumabak sa Silesia leg ng Diamond League sa Agosto 6 sa Poland at Gyulai Istvan Memorial-Hungarian Athletics Grand Prix sa Agosto 8 sa Hungary. (ANN ENCARNACION)
121
