KAISA ng Meralco ang pamahalaan, at ang buong bansa sa laban sa pandemyang COVID-19.

Mula pa nang nagsimula ang pandemyang ­COVID-19 noong Marso 2020 ay siniguro ng ­Meralco na magpapatuloy ito sa pagbibigay ng mahusay at maaasahang serbisyo ng kuryente sa mga customer.

Sa kabila ng aming mga ginagawa at mga inisyatiba upang masiguro ang patuloy na pagbibigay serbisyo sa aming mga customer, hindi maiiwasang mayroon pa ring mga batikos na ­ibinabato sa kumpanya.

Sa isang liham na ipinadala ng aming Chief Commercial Officer and Head of Customer Retail Services na si Engr. Ferdinand Geluz sa isang ­pahayagan kaugnay ng isang column na inilabas nito kamakailan ay pinasinungalingan nito ang mga paratang na tila hindi nagbibigay ng konsiderasyon ang Meralco sa mga customer.

Sa liham ay binigyang diin ni Engr. Geluz na bagamat nagbalik na ang operasyon ng Meralco sa pagpuputol ng serbisyo ng kuryente, siniguro naman nito na nagbibigay pa rin ang Meralco ng konsiderasyon sa mga customer na wala pang sapat na pangbayad sa bayarin sa ­kuryente.

Bukas ang tanggapan ng Meralco para sa mga nais makipag-usap ukol sa kanilang Meralco bill. Marami na ang nabigyan ng mas mahabang palugit at marami rin ang isinailalim sa espesyal na installment payment agreement (IPA).

Sa kasalukuyan, nasa 27,000 na customer na ang naitalang nabigyan ng IPA, at 95% sa mga ito ay residential na customer. Bunsod nito ay maiiwasan ng customer ang pagkaputol ng serbisyo ng koryente kahit na hindi pa nababayaran ng buo ang bill.

Nilinaw rin ni Engr. Geluz na hindi prayoridad ng Meralco ang pagpuputol ng serbiyso ng kuryente ng mga customer. Sa ­katunayan, alinsunod sa direktiba ng Department of ­Energy (DOE) ay muli ­naming pinalawig hanggang Marso ang aming ipinatupad na No Disconnection Policy para sa mga customer na ang konsumo ay 100 kWh pababa.

Ayon sa aming datos, nasa 40% ng aming mga customer ang ­matutulungan ng nasabing direktiba.

Kung inyong maaalala, mula Marso 2020 hanggang Disyembre 2020 ay pansamantala rin naming sinuspinde ang operasyon ng pagpuputol ng serbisyo ng koryente ng mga konsyumer na hindi nakakapagbayad ng bill sa tamang oras.

Ito ay upang masiguro na ang lahat ay mayroong serbisyo ng kuryente sa panahon ng pandemya kaugnay ng mga ipinatupad na community lockdown.

Ito rin ay ginawa ng ­Meralco upang makabawas sa pinansyal na alalahanin ng mga customer, lalo na ­yaong mga lubhang naapektuhan ng ­pandemyang COVID-19.

Isa rin sa mga ­nilinaw ni Engr. Geluz ang ukol sa pagkakaroon ng ­proseso sa pagpapadala ng ­disconnection notice sa mga customer bago ang petsa ng putulan ng ­serbisyo ng kuryente. ­

Siniguro niya na sumusunod ang mga empleyadong nagdadala ng mga nasabing notice sa tahanan ng mga customer, at maging ang aming mga disconnection crew.

Sa kabila ng pandemya ay nanatiling 24/7 ang operasyon ng Meralco.

Patuloy din ang aming pagbibigay ng mga naaangkop na impormasyon sa aming mga customer sa pamamagitan ng aming mga social media channel, sa Facebook at Twitter.

Bukas din ang ­aming customer hotline 24/7 sa bilang na 16211.

Makasisiguro ang aming mga customer na kami ay handang magbigay serbisyo anumang oras man nila ito kailanganin.

Kami rin ay humihingi ng pasensya at pag-unawa sa aming mga customer ukol sa anumang abalang aming naidulot sa kanila.

Makakaasa ang aming mga customer na patuloy ­kaming magsusumikap upang patuloy na makapagbigay ng mahusay na serbisyo.