SINIMULAN na ang pagtuturo sa mga doktor ng National Bureau of Investigation (NBI) ni United Nations forensic expert Dr. Morris Tidball-Binz.
Si Tidball-Binz ay inimbitahan ni Department of Justice Secretary Jesus Crispin Remulla para turuan hinggil sa forensic pathology ang mga doktor ng NBI kaugnay ng gagawing pagbusisi sa mga biktima ng war on drugs.
Ayon kay spokesperson Atty. Giselle Garcia-Dumlao, nagkaroon na ng unang diskusyon ang kanilang mga doktor kay Dr. Tidball-Binz.
“The NBI had a focused discussion with forensic expert Morris Tidball-Binz this afternoon (February 8) on how to enhance our forensic and investigative capacity,” ayon kay Garcia-Dumlao.
Inimbitahan ni Remulla si Dr. Tidball-Binz para magsagawa ng “capacity-building mission” noong Nobyembre 13, 2022, nang magkita sila sa Geneva sa ginanap na Universal Peer Review ng United Nations Human Rights Council.
Si Dr. Tidball-Binz ay isa ring UN Special Rapporteur ngunit nilinaw ni Remulla na ang kanyang pagbisita sa Pilipinas ay ukol lamang sa forensic education sa mga doktor, pulis, at prosecutors at walang kinalaman sa ‘extra-judicial killings’.
Sinabi rin ni Garcia-Dumlao na pinagsusumite na sila ni Remulla ng listahan ng medical doctors at mga impormasyon nila para sumailalim sa pagsasanay ni Dr. Tidball-Binz. (RENE CRISOSTOMO)
![](https://saksingayon.com/wp-content/plugins/dp-post-views/images/eyes.png)