TARGET ni KA REX CAYANONG
ISANG malaking hamon sa pamahalaan ang patuloy na paglikom ng kita para pondohan ang mga programa at serbisyo nito.
Kaya mahalaga ang bawat hakbang na nagpapataas sa koleksyon ng mga ahensyang nangongolekta ng buwis.
Kabilang dito ang Bureau of Customs (BOC) na nakapagtala ng pinakamataas na koleksyon sa kasaysayan nito na P97.463 bilyon noong Oktubre 2026.
Sa kabila ng pagbaba ng dami ng mga inaangkat na produkto, nagawa pa rin ng ahensya na makalikom ng mas malaking halaga.
Mas mataas ito ng P14.501 bilyon kumpara sa P82.962 bilyong koleksiyon noong Oktubre 2025.
Katumbas naman ito ng 99.42 porsyento ng itinakdang target na P98.028 bilyon para sa nasabing buwan.
Hindi lamang sa buwan ng Oktubre nakita ang pagtaas ng koleksyon ng BOC.
Mula Enero hanggang Oktubre 2026, umabot na sa P853.662 bilyon ang kabuuang nakolekta ng ahensya.
Lumampas ito ng P7.140 bilyon sa target na P846.522 bilyon sa loob ng sampung buwan.
Malinaw na mahalaga ang ganitong resulta dahil malaking bahagi ng kita ng pamahalaan ay nagmumula sa mga buwis at bayarin sa mga inaangkat na produkto.
Sa pamumuno ni Customs Commissioner Ariel Nepomuceno, kabilang sa mga hakbang na isinulong ang mas mahigpit na pagsubaybay sa koleksiyon, pagpapahusay sa pangangasiwa at pagpapalakas sa trabaho ng mga tauhan ng ahensya.
Ayon kay Nepomuceno, hindi lamang ito bunga ng isang tao kundi ng sama-samang pagsisikap ng mga kawani ng BOC sa iba’t ibang bahagi ng bansa.
Dapat kilalanin ang papel ng mga kawani na araw-araw na nagsasagawa ng kanilang tungkulin upang matiyak na tama at maayos ang pangongolekta ng buwis.
Sa ganitong paraan, napalalakas ang kakayahan ng pamahalaan na makalikom ng pondong magagamit sa mga serbisyong kailangan ng publiko. May hamon pa ring kinahaharap ang BOC dahil target nitong maabot ang P1.011 trilyong koleksiyon ngayong taon.
Kailangan pa nitong makalikom ng mahigit P157 bilyon sa natitirang dalawang buwan upang maabot ang taunang target. Hindi ito madaling gawin, kaya mahalagang ipagpatuloy ang mahigpit na revenue monitoring, pagpapatupad ng batas at pagpapabilis ng mga proseso sa kalakalan.
Sa pamumuno ni Nepomuceno, ang susunod na sukatan ay kung mapananatili ng BOC ang ganitong antas ng koleksiyon hanggang sa pagtatapos ng taon. Ang naitalang rekord ay isang mahalagang hakbang, ngunit mas mahalaga ang tuloy-tuloy na resulta at maayos na paggamit ng bawat pisong nakokolekta para sa kapakinabangan ng sambayanan.
12 
