Month: July 2021

IPINALIWANAG ng Malakanyang na ang naging desisyon ni Pangulong Rodrigo Roa Duterte na bawiin ang pagpapawalang-bisa sa Visiting Forces Agreement (VFA) ay base sa pinanindigang PH strategic core interests.

“PRRD’s decision to recall the abrogation of VFA is based on upholding PH strategic core interests, the clear definition of PH-US alliance as one between sovereign equals, and clarity of US position on its obligations and commitments under Mutual Defense Treaty (MDT),” ayon kay Presidential spokesperson Harry Roque.

“PH will, however, continue to engage other countries for partnerships that work, based on our core national interests,” dagdag na pahayag ni Sec. Roque.

Sa ulat, ipinag-utos ni Pangulong Duterte ang pagbawi sa pagwawakas ng VFA sa Estados Unidos.

“The President decided to recall or retract the termination letter for the VFA,” ayon kay Defense Secretary Delfin Lorenzana.

Ang anunsyong ito ni Lorenzana ay matapos bisitahin ni US Defense Secretary Lloyd J. Austin III si Pangulong Duterte sa Malakanyang.

Para naman kay Austin, sinabi nito na “on behalf of the United States,” masaya ito sa naging desisyon ng pangulo “to fully restore the VFA.”

“A strong, resilient US-Philippine alliance will remain vital to the security, stability, and prosperity of the Indo-Pacific. A fully restored VFA will help us achieve that goals together,” ani Austin.

Bukod sa isyu ng VFA ay natalakay rin sa ginanap na bilateral meeting ang mga isyu hinggil sa pagpapalakas sa security ties at defense cooperation ng dalawang bansa, mga kaganapan sa South China Sea (SCS) at Indo-Pacific region at maging ang giyera laban sa COVID-19.

Magugunitang bahagyang nayanig ang relasyon ng US at Pilipinas sa kautusan ng pangulo na wakasan ang VFA, sa gitna na rin ng umiinit na tension sa West Philippine Sea bunsod ng agresibong pag-angkin ng China sa ilang teritoryo na inaangkin din ng ilang bansa sa Asya.

Nakapaloob sa VFA na nilagdaan nuong 1998, ang mga gabay at alituntunin na sinusunod hinggil presensiya ng libo-libong US troops sa bansa na pumapasok at lumalabas para sa war drills and exercises, bukod dito, nakadepende rin sa VFA ang ilang military agreements.

Nitong Huwebes ay sinabi ng Malakanyang na tinanggap ni Pangulong Duterte si Austin ilang oras matapos itong dumating sa Maynila para ipagdiwang ng dalawang bansa ang 75-year-old diplomatic ties at 70 taon ng Mutual Defense Treaty.

Sa kabilang dako, pinasalamatan ni Pangulong Duterte ang Estados Unidos sa tulong nito sa Pilipinas para sa COVID-19 pandemic, lalo na ang naging kontribusyon ng COVAX facility, kung saan nakatanggap ang Pilipinas ng mahigit sa 3 milyong doses ng anti-COVID-19 vaccines.

Nagpahayag naman si Austin ng malaking paggalang sa mga Filipino.

Aniya, nakahanap ang Estados Unidos ng “strong relationship” sa Pilipinas bilang “equal sovereign partner.”

Si Austin, nasa official visit sa Maynila hanggang Hulyo 30 (kahapon), ay nakatakdang makipagpulong kina Philippine counterpart, Defense Chief Delfin Lorenzana at Foreign Affairs Secretary Teodoro Locsin Jr. (CHRISTIAN DALE/JESSE KABEL)

WALANG bibigyan ng espesyal na trato ang pamahalaan kahit mga indibidwal na ‘fully-vaccinated’ na dahil kabilang pa rin ang mga ito sa pagbabawalang lumabas sa oras na ipatupad na ang enhanced community quarantine (ECQ) sa Metro Manila sa Agosto 6 hanggang 20.

Ito ang pagtiyak ni Department of Health (DOH) Undersecretary Maria Rosario Vergeire.

Aniya, hindi mamimili ang pamahalaan sa mga hindi pa nababakunahan at bakunado na dahil tanging ‘authorized persons outside of their residence (APOR)’ ang papayagang makalabas sa panahon ng ECQ.

“There will be no distinction between vaccinated and unvaccinated individuals… No differentiation between vaccinated and unvaccinated. Only the APORs will be allowed outside,” ayon kay Vergeire.

Iniiwasan din ng pamahalaan ang posibleng reklamo ng mga handa na ngunit hindi pa nababakunahan dahil sa kakapusan ng suplay ng COVID-19 vaccines.

“Ibig sabihin doon po sa mga hindi bakunado, meron po diyan na ayaw po talaga nilang magpabakuna, ngunit meron din po diyang gusto niyang magpabakuna pero hindi pa ho siya nakakapag-access ng bakuna,” saad pa ni Vergeire.

Sa huling anunsiyo ng Palasyo, umaabot pa lamang sa 7.8 milyong Filipino ang nakakumpleto na ng bakuna laban sa COVID-19. (RENE CRISOSTOMO)

PASADO na sa pinal na pagbasa sa mababang kapulungan ng Kongreso ang panukalang pagtatatag ng Virology Science and Technology Institute of the Philippines (VIP).

Ang VIP ay isa sa priority measures na ipinanawagan ni Pangulong Rodrigo Duterte sa kanyang huling State of the Nation Address (SONA) .

Ayon sa may akda ng House Bill 9559 na si Quezon Rep. Angelina Helen Tan, layon ng panukala na makapagtayo ang Pilipinas ng isang virology research center.

Binanggit pa ni Tan, chairman ng Senate Committee on Health, ang pagtatatag sa nasabing ahensya ay paunang hakbang para maituon ang pagpapaunlad at pagsasaliksik para sa virology science at technology applications sa mga halaman o tanim, hayop at sa tao.

Sa ilalim ng panukala ng mambabatas, ang VIP ang siyang pangunahing mananagot at mangunguna sa preparasyon ng bansa laban sa pandemya at public health emergencies.

Ito rin ang magpapatupad ng mga polisiya, plano at mga programa gayundin ng mga proyekto ukol sa pagpapabuti at pagpapaunlad sa teknolohiya para sa paglaban ng virus.

Nabatid na aabot sa P283 milyon ang ilalaang pondo para sa pagtatatag ng VIP na nakapaloob na sa 2021 National Expenditure Program o NEP, ayon na rin kay Department of Science and Technology o DOST Sec. Fortunato dela Peña.

Bukod dito, may kautusan na rin si Pang. Rodrigo Duterte na isama ang pondo para sa VIP sa panukalang 2022 national budget.

KINALAMPAG ni Anakalusugan Rep. Mike Defensor ang Department of Budget and Management (DBM) at Department of Health (DOH) na ipatupad ang kautusan ng Malacanang na ibigay ang karagdagang basic salary pay ng mga government nurse.

Ginawa ni Defensor ang pangangalampag matapos makarating sa kanyang kaalaman na hanggang ngayon ay hindi pa natatanggap ng mga nurse sa Quezon City ang dagdag na P3,000 sa kanilang sahod.

Ayon sa mambabatas, naglabas ng memorandum si Executive Secretary Salvador Medialdea noong Hunyo 1, 2021 na baliktarin ang demotion ng mga nurses at ibigay ang dagdag nilang sahod.

“Our healthcare workers holding Nurse ll positions should have been receiving an additional P3,000 a month but they are not getting it. We call them heroes of the fight against the COVID-19 pandemic together with other frontline personnel, but that’s just an empty rhetoric,” ani Defensor.

Ayon sa mambabatas, maaaring gamitin ng DBM at DOH ang P29.3-billion compensation adjustment fund sa 2021 national budget para sa salary increase ng mga nurse.

“The DBM should take it upon itself to immediately implement Secretary Medialdea’s directive. It was the DBM in the first place which demoted our nurses last year, including those in local government units (LGUs) throughout the country,” ani Defensor.

Magugunita na na-demote ang mga Nurse II dahil ipinantay sa Nurse I ang kanilang sahod nang ipatupad ang Salary Grade 15 o katumbas ng P33,575 sahod.

Sinabi ng mambabatas na base sa grupo ng mga nurse, malaking porsyento ng government nurses ay binubuo ng Nurse II at sila umano ang pinakadehado.

Dahil dito, naglabas ng circular si Medialdea subalit kapos pa rin umano ng mahigit P3,000 ang tinatanggap na sahod ng mga Nurse II at hindi pa rin ibinibigay ang kanilang backpay kahit may kautusan na ang una.

“With the OP order, all nurse positions were restored, while Nurse ll holders were entitled to SG 16 pay (minimum of P36,628, rising to P39,650 depending on length of service), instead of SG 15,” ani Defensor. (BERNARD TAGUINOD)