SA kanyang unang direktiba bilang bagong Bureau of Customs (BOC) chief, ipinag-utos ni BOC Commissioner Ariel Nepomuceno na suspendihin ang pagpapatupad ng lahat ng naunang naaprubahan ngunit hindi naisilbing Letters of Authority (LOAs) at Mission Orders (MOs).

Sa kanyang memorandum na inilabas nitong nakalipas na linggo, sinabi ni Nepomuceno na naaangkop ang direktiba sa lahat ng LOA at MO na inisyu bago ang Hulyo 2, 2025, “That have yet to be served and covers all units under the Intelligence and Enforcement Groups.”

Sa pinakahuling memorandum ng BOC, nag-utos din sa kinauukulang Deputy Commissioners na magsumite ng komprehensibong status report sa lahat ng LOA at MO na inisyu mula Enero 1 hanggang Hunyo 30, 2025, “within 24 hours of receipt.”

“We are implementing this step to clearly determine what actions are still pending and to ensure that all enforcement efforts are legally sound, properly documented, and aligned with the Bureau’s direction moving forward,” sabi pa ni Nepomuceno.

Paliwanag ng bagong hepe ng BOC, ang pagsususpinde sa lahat ng hindi naseserbisyuhan na mga LOA at MO bago siya maupo sa tungkulin ay “part of a broader effort to restore discipline in field operations, prevent unauthorized or outdated enforcement activities, and reinforce the agency’s commitment to lawful and transparent practices.

“Nananatiling nakahanay ang Bureau of Customs sa direktiba ni Pangulong Ferdinand R. Marcos Jr., na gawing propesyonal ang mga operasyon ng gobyerno at paigtingin ang pagsisikap laban sa smuggling at pagtagas ng kita,” ayon sa hepe ng BOC.

(JESSE RUIZ)