CAVITE – Nalambat ng mga operatiba ng Cavite Police ang tatlong nasa listahan ng most wanted persons (MWP), sa isinagawang operasyon sa magkakahiwalay na lugar sa lalawigan.

Kinilala ang mga naaresto na sina alyas “Bryan”, MWP, rank no. 9 provincial level ng Camarines Sur PPO, at rank no. 1 ng Tigaon MPs, CSPO, PRO 5; “Andre”, MWP, provincial level, at “Rocky” MWP, city level.

Si Bryan ay inaresto bandang alas-8:30 ng umaga ng mga operatiba ng Gen. Trias City, Cavite Warrant and Subpoena Section, kasama ang Tigaon MPS, dahil sa kasong paglabag sa Section 5 at 11 ng R.A. 9165 o Comprehensive Dangerous Drugs Act of 2002, na inisyu ni Presiding Judge Randi Aquino Gobot, ng Regional Trial Court, Fifth Judicial Region, Branch 30, San Jose Camarines Sur.

Isinilbi naman ang warrant of arrest sa loob ng BJMP, Brgy. Molino 2, Bacoor City, ng mga personnel ng Warrant Section ng Bacoor City Police laban kay Andre dahil sa kasong paglabag ng Sec. 5 at 11 ng Article II ng RA 9165, na inisyu ni Presiding Judge Arnel G. Espiritu ng RTC, Br. 110 – Bacoor City, Cavite bandang alas-6:06 ng gabi.

Ang akusado ay inilipat sa Bacoor Custodial Center Bacoor City, Cavite.

Samantala, si Rocky ay inaresto bandang alas-6:50 ng gabi sa Brgy. Santiago, Gen. Trias City ng personnel ng Warrant Section dahil sa kasong qualified theft na inisyu ni Presiding Judge Elmer Joseph R. Guerzon, ng Regional Trial Court, National Capital Judicial Region, Branch 114, Pasay City.

May inirekomendang P40,000.00 piyansa para sa pansamantang paglaya ni Rocky.

(SIGFRED ADSUARA)