TARGET ni KA REX CAYANONG
MAHALAGA ang edukasyon sa paghubog ng kinabukasan ng bansa.
Kaya naman dapat tiyakin na may sapat at maayos na mga paaralan para sa mga mag-aaral.
Ngunit sa maraming lugar, may mga pampublikong paaralan na nakatayo sa mga lupang wala pang malinaw na titulo.
Dahil dito, nahihirapan ang DepEd na magsagawa ng mga proyekto para sa pagpapalawak at pagpapaganda ng mga pasilidad.
Ito ang nais tugunan ng panukalang inihain ni Parañaque City Rep. Brian Yamsuan.
Layunin nitong mailipat sa pangalan ng DepEd ang mga lupang matagal nang ginagamit ng mga pampublikong paaralan.
Sa ganitong paraan, mas mapabibilis ang pagpapatayo ng mga bagong silid-aralan at iba pang gusali.
Mababawasan din ang mga legal na problemang nagiging sanhi ng pagkaantala ng mga proyekto.
Napapanahon ang panukalang ito dahil malaki pa rin ang kakulangan ng mga classroom sa bansa. Marami ring paaralan ang gumagamit ng mga lumang gusaling nangangailangan ng pagkukumpuni.
May ilan pang silid-aralan na hindi na ligtas gamitin ng mga estudyante at guro.
Kung hindi agad maaaksyunan ang problemang ito, mas lalaki pa ang kakulangan sa classrooms sa mga susunod na taon.
Kaya naman, mahalagang magkaroon ng malinaw na pagmamay-ari ng lupa upang tuloy-tuloy ang mga proyekto ng DepEd.
Kasabay nito, dapat ding tiyakin na mapoprotektahan ang karapatan ng mga lehitimong may-ari ng lupa sa pamamagitan ng tamang proseso.
Ang panukalang ito ay hakbang upang masigurong mas maraming kabataang Pilipino ang magkakaroon ng ligtas, maayos, at de-kalidad na lugar para sa pag-aaral.
96 
