(NI KEVIN COLLANTES)

MAGANDANG balita sa mga commuters ng Metro Rail Transit Line 3 (MRT-3) dahil makaaasa na ng ‘mas chill’ o mas malamig na biyahe sa pagsakay sa mga tren ng naturang rail lines.

Nabatid mula sa Department of Transportation (DOTr) na may mga bagong airconditioning unit na ang ikinakabit ngayon sa mga bagon ng mga tren ng MRT-3.

Ayon sa DOTr, ang naturang 33 aircon units na pawang brand new, ay dumating sa bansa noong Agosto 3 hanggang 20.

Unang batch pa lamang anila ito ng kabuuang 120 aircon units na binili ng contractor na Sumitomo-MHI-TESP sa halagang P167 milyon,  bilang bahagi ng malawakang rehabilitasyon sa linya ng MRT-3.

Ang MRT-3 ay bumibiyahe mula North Avenue, Quezon City hanggang Taft Avenue, Pasay City, via Epifanio delos Santos Avenue (EDSA).