BINALEWALA lang ni Presidential spokesperson Harry Roque ang ulat na ang Pilipinas ang bagong COVID-19 hotspot sa Southeast Asia matapos malagpasan ang Indonesia.
Inanunsyo ng Pilipinas na nakapagtala ito ng 3,561 bagong kaso ng may COVID dahilan upang umabot na ito sa kabuuang 119,460 habang ang Indonesia naman ay napaulat na mayroong 1,882bagong kaso para sa kabuuang 118,753.
Subalit, sinabi ni Sec. Roque na ang Pilipinas ay nakapagsagawa na ng tests para sa 1.5% (1.64 million) ng populasyon nito na 110 million habang ang COVID-19 tests naman ng Indonesia ayumabot lamang sa 0.34% (908,000) ng populasyon nito na 273 million.
Dagdag pa ni Sec. Roque, ang pagtaas ng bilang sa Pilipinas ay maaaring i-attribute sa agresibong ‘testing and tracing efforts’ ng pamahalaan.
“Dahil mas maigting ang ating pagti-test, hindi po totoo na mas maraming kaso tayo kaysa sa Indonesia,” ayon kay Sec. Roque.
“Hindi lang nalalaman ng mga Indonesian kung sinu-sino iyong mga umiikot na mayroon na pong sakit; at least tayo po, alam natin kung sino na po sila,” dagdag na pahayag nito.
Samantala, sinabi ni Sec. Roque na ang mga bansa sa buong mundo ay nakararanas din ng pagsirit ng COVID-19 infections.
Tinukoy nito ang ulat ng Nikkei Asian Review noong Agosto 2 na may 126 bansa at rehiyon o may 70% ng buong mundo ang nakapagtala ng pagtaas ng bagong naiulat na kaso. (CHRISTIAN DALE)
219 
