WELCOME sa Malakanyang ang kahandaan ng Kongreso na bigyan si Pangulong Rodrigo Roa Duterte ng emergency powers para ireporma ang Philippine Health Insurance Corp. (PhilHealth) dahil sa maraming iregularidad at anomalya.
Iyon nga lamang ani Presidential spokesperson Harry Roque ay nais niya munang makita at malaman kung ano talagang emergency powers ang nais na ibigay ng Kongreso sa Pangulo.
“Well, we welcome the willingness of the House of Representatives to give such emergency powers to the President, pero hindi po ako makakomento kasi hindi ko pa nakikita kung ano talaga iyong rekomendasyon ng mababang kapulungan,” ayon kay Sec. Roque.
Ang PhilHealth aniya ay binuo dahil sa isang batas at naamyendahan ang PhilHealth law sa pamamagitan ng Universal Healthcare Law.
Sa ulat, iminumungkahi ng joint committee ng House of Representatives na bigyan si Pangulong Duterte ng emergency powers para ireporma ang PhilHealth.
Sinabi ni House Committee on Public Accounts chair Mike Defensor na bukas ang kanyang panel na bigyan si Pang. Duterte ng emergency powers, kasunod ng naturang mga kontrobersiya.
Samantala, pabor din si Health Secretary Francisco Duque III sa naturang proposal, na virtually present sa pagdinig ng committee on good government and public accountability.
Ganun din ang naging posisyon ni Justice Undersecretary Adrian Sugay, na present din sa pagdinig.
Una nang itinalaga ni Pangulong Duterte si dating National Bureau of Investigation director Dante Gierran bilang kapalit ni PhilHealth president at CEO Ricardo Morales, na bumaba sa pwesto dahil sa medical reasons. (CHRISTIAN DALE)
124 
