IKINABAHALA ni Senador Risa Hontiveros ang pagbasura ng Department of Social Welfare and Development (DSWD) sa benepisyo ng mahigit 91,000 lola at lolo na hindi mabibigyan ng pensiyon sa 2021 national budget.

Sa pahayag, sinabi ni Hontiveros na noong nakaraang taon, tanging 84% ang nabigyan ng pensiyon at hindi pa lahat sa mga ito ay nabigyan, pero ngayon kinaltasan pa.
“There is an alarming neglect of our senior citizens. Parang isinantabi natin sila.

“Ang mga lolo’t lola natin ang pinakabulnerable sa lipunan, may pandemya man o wala. Pensyon na lang ang inaasahang pantawid sa pang-araw-araw na gastos, kasama na ang gamutan. Imbis na taasan ang halaga, binawasan pa natin sa gitna ng krisis,” himutok ng mambabatas.

Sinabi ni Hontiveros na maraming pamilya ang nakikipagbuno ngayon upang makakain at makahulagpos sa kasalukuyang kahirapan sa gitna ng pandemya.

“Higit 50,000 senior citizens ang naghahanap pa ng trabaho sa gitna ng pandemya, despite having the highest COVID-19 mortality risk. Di na alintana ang panganib sa kalusugan para lang patuloy na suportahan ang sarili at ang kanilang mga pamilya,” aniya.

“Pero kahit magbukas pa ang ekonomiya, habang wala pang vaccine, hindi pa din sila makakalabas as clearly stated by the IATF guidelines. It is even more urgent that we distribute the social pension immediately. Obligasyon ng gobyerno na protektahan ang mga senior citizens,” giit pa ng senador.

Ayon kay Hontiveros, tinatrabaho ng kanyang tanggapan ang panukalang badyet ng DSWD katulong ang Coalition of Services of the Elderly.
“Ngayong budget deliberations, sisiguraduhin natin na hindi maiiwan ang mga lolo’t lola. Siguraduhin nating naalagaan at nasusuportahan ang pangangailangan nila,” aniya. (ESTONG REYES)