GANITO ang kasaysayan ng buhay ni Jimmy Butler bago naging NBA superstar.

Sa murang edad na 13, si Butler ay pinalayas mismo ng kanyang ina sa kanilang tahanan at nabuhay na palaboy.

Lumaki si Butler sa isang maliit na bayan sa labas ng Houston na walang nakilalang ama.

Kung hindi ninyo alam ang kanyang istorya, malamang na ang iisipin ninyo ay kung paano siya pinalaki ng kanyang ina para marating ang kinalalagyan niya ngayon.

Sa isang banda, maaaring ganoon nga.

Pero hindi sa paraang inaasahan ninyo.

Bago siya pinaalis ng kanyang ina sa kanilang tahanan ay pinabaunan pa siya ng mapait na salitang: “I don’t like the look of you. You gotta go.”

Sa maraming taong lumipas, nagpalipat-lipat si Butler ng matitirhan, mula sa bahay ng isang kaibigan hanggang sa isa pa … at isa pa… Nang sumapit siya sa tamang edad, ang ina ng isa niyang kaibigan na may pitong supling ay inampon siya.

“They accepted me into their family, and it wasn’t because of basketball,” ani Butler patungkol sa ginang na nagngangalang Michelle Lambert. “She was just very loving. She just did stuff like that. I couldn’t believe it.”

Si Butler ay isang ‘di kilalang manlalaro ng kanyang eskuwelahan (two-star guard na may ranggong pang-73 sa Texas).

Mula sa hamak na kalagayang iyon, napasama si Butler sa NBA draft (kahuli-hulihan sa 1st round). Naging NBA Most Improved Player at naranasan pang makasama ni Michael Jordan sa ilang shooting exhibition.

Pero huwag kayong maawa sa kanya. Ayaw na ayaw niyang kaawaan siya.

Hindi sa dahilang ­mayaman at sikat na siya ngayon, kundi dahil na rin sa mga hirap na pinagdaanan niya sa buhay.

Galit si Butler sa kasaysayan niyang iyon.

Kinasusuklaman niyang matawag na “homeless,” na ayon sa kanya ay “blown “out of proportion” sa maraming pagkakataon.

“I was not living under a bridge. Or standing on the corner asking for change,” pagtatangol niya sa sarili. “That’s not what it was. I’m not going to say it was the easiest of times, don’t get me wrong, but I had a home. Or homes.”

“Me and my family are on great terms now,” sabi niya tungkol sa kanyang tunay na ina na nakasama niya noong nakaraang tag-araw sa bayan nila sa Tomball. “I’m good. I’m OK.”

Hindi siya naniniwala sa nangyari sa buhay niya sa Tomball, kung saan nahubog siya para maging NBA All-Star shooting guard noong naglalaro pa siya sa Chicago Bulls hanggang mapabilang sa Miami Heat ngayon.

“I would call it the step before a new beginning,” anang bagong Jimmy Butler. “I’m not going to say this is the beginning. This is the step right before.”

“Please, I know you’re going to write something. I’m just asking you, don’t write it in a way that makes people feel sorry for me,” kabilin-bilinan ni Butler sa panayam ng ESPN bago napunta sa

Miami sa pagsisimula ng 2020 season. “I hate that. There’s nothing to feel sorry about. I love what happened to me. It made me who I am. I’m grateful for the challenges I’ve faced. Please, don’t make them feel sorry for me.”