TULOY na ang itinakdang registration para sa National ID kasunod nang pamamahagi ng Armed Forces of the Philippines (AFP) ng National Identification System (PhilSys) registration kits sa 32 provincial offices ng Philippine Statistics Authority (PSA) nitong nakalipas na linggo.

Nabatid na hinati ni AFP chief of staff Gen. Gilbert Gapay sa tatlong major service command ang pamamahagi ng registration kit sa buong Pilipinas.

Responsibilidad ng Philippine Army na magkaloob ng logistics support at paghahatid ng registration kits sa PSA provincial offices sa Luzon, habang ang Philippine Navy ang pamamahagi sa Visayas at sa Philippine Air Force naman ang mga PSA provincial office sa Mindanao.

Ang registration kits ay ibinigay ng NEDA sa AFP nuong nakaraang October 30 at inihatid sa PSA head office sa Diliman, Quezon City nuong November 6.

Nauna nang hiniling ni acting NEDA Secretary Karl Kendrick Chua ang tulong ng AFP sa pamamagitan ni Defense Secretary Delfin Lorenzana na bigyan ng logistics support and transportation ang may 4,000 registration kits sa 655 siyudad at munisipalidad sa buong bansa.

Layon lamang ng NEDA sa paghingi ng tulong sa AFP na matiyak na safe and secured ang pag-transport sa PhilSys registration kits lalo na at limitado pa rin ang inter-island at provincial transportation sa mga probinsiya dahil sa umiiral na community quarantine sa buong bansa.

Kaugnay nito, positibo ang pananaw ni Gapay na malaking tulong ang national ID system sa pagpapanatili ng peace and order lalo na at mahihirapan na ang mga kriminal, terorista at iba pang lawless elements na gumamit ng pekeng identities para maghasik ng krimen at terorismo sa bansa.

“The National ID System will help us and other law enforcement agencies to curb criminality and terrorism as we can now validate and expose criminals’ identities and prevent them from hiding in other law-abiding citizens’ identity. This will also constrain and lose their freedom of movement, and they will be isolated and unable to transact business as no official identification can be presented when demanded,” pahayag ni General Gapay. (JESSE KABEL)