NANAWAGAN si Senate Majority Leader Migz Zubiri sa Inter-Agency Task Force na payagan na silang makabili ng kahit 5,000 doses ng bakuna para sa kanilang mga empleyado.

Sa sesyon ng Senado, iginiit ni Zubiri na dapat mabigyan na rin ng bakuna ang kanilang mga empleyado na kailangang magtungo sa Senado para sa kanilang operasyon.

Nilinaw ni Zubiri na ang kanilang mga empleyado at hindi silang mga senador ang nais niyang bigyan ng paunang bakuna.
Pinuna rin ng senador ang impormasyon na ilang lokal na pamahalaan ang nagbabakuna na ng mga opisyal ng barangay kasama ang ilang volunteers.

“Today in the news before I left to drive here by myself, I found out that an actor is also vaccinated and he is defended by the mayor and said it was above board,” diin pa ni Zubiri.

Kinukuwestyon ni Zubiri ang patakaran sa vaccination program dahil nauuna pa ang mga barangay volunteer at aktor sa mga tauhan ng Senado at Kamara.

Nababahala ang senador na kung hindi pa mababakunahan ang mga staff ng Senado ay posibleng hindi rin makapagsagawa ng pagdinig at sesyon sa Mayo kung saan magsisimula na silang talakayin ang 2022 budget.

Kinumpirma naman ni Sotto na mananatiling lockdown ang Senado hanggang Abril 12 kasunod na rin ng pagtaas ng kaso ng COVID-19. (DANG SAMSON-GARCIA)