(ESTONG REYES/FERNAN ANGELES)

DIDIKDIKIN ng Senado ang dating hepe ng procurement services ng Department of Budget and Management (DBM) na dati ring tauhan ni Senador Bong Go dahil sa pagkakasangkot sa maramihang pagbili ng overpriced medical supplies kontra COVID-19 sa Department of Health (DOH).

Sa pahayag, sinabi ni Senador Richard Gordon na kanyang nilagdaan ang isang Subpoena Ad Testificandum laban kay dating Department of Budget and Management (DBM) Undersecretary Lloyd Christopher Lao upang dumalo sa susunod na pagdinig ng Senado hinggil sa 2020 Commission on Audit (COA) report sa overpriced medical supplies ng  Department of Health (DOH).

Ayon kay Gordon, chairman ng Senate Blue Ribbon Committee na inaprubahan ni Senate President Vicente Sotto III ang subpoena kay Lao, na nagbitiw noong Hunyo bilang hepe ng Procurement Services ng DBM noong bumili ang pamahalaan ng maraming masks at face shield laban sa COVID-19 pandemic.

“He will be asked to explain the circumstances of such procurement. It is important that he appears because there are so many questions that need answers especially; he was previously investigated over procurement of overpriced medical supplies and equipment as Usec. Canda said,” ayon kay Gordon.

Sa ginanap na press briefing kamakailan, sinabi ni Lao na gusto nitong dumalo sa pagdinig sa susunod na linggo upang linawin ang lahat ng bagay saka idinagdag na akmang lugar ang Blue Ribbon Committee.

“Mr. Lao is still in the Philippines, or at least, has not left the country, as certified by the Bureau of Immigration. This is a good sign that can only mean to indicate that he is not fleeing and can help us in our investigation in bringing light to the seemingly murky processes of government procurement,” ayon kay Gordon.

Ipinaliwanag ni Gordon na: “A subpoena ad testificandum compels the person so summoned to appear before it to answer questions regarding the matter being heard and discussed. Refusal or failure to appear can be subject to a contempt citation, which the Committee of the Senate has previously, and on occasion, imposed.”

“In order to ensure that the subpoena is served, the Blue Ribbon sought the assistance of the Philippine National Police (PNP) and the National Bureau of Investigation (NBI),” giit ng senador.

Koneksyon
kay Sen. Go

Matapos lumutang ang pangalan ni Lao sa kontrobersyal na overpriced procurement at pagkakaroon ng kaugnayan kay Senador Go, agad naglabas ng pahayag ang huli na itinatangging nagsilbing aide niya ang kontrobersyal na dating DBM PS official.

“I wish to clarify that contrary to claims of some personalities and news outlets, former USec. Lloyd Christopher Lao of the DBM Procurement Services was never my aide. To call him such is inaccurate,” sabi ni Go.

Paliwanag pa nito na si Lao ay nagsilbing volunteer election lawyer ni Pangulong Rodrigo Duterte noong 2016 at na-appoint sa Presidential Management Staff hanggang 2017.

“He was a volunteer election lawyer of President Duterte in 2016 and was appointed to the Presidential Management Staff at the start of the term until early 2017. After which he was appointed to HLURB and later to the DBM in 2019 before resigning last June of this year. Lao did not directly report to me nor did he ever serve as my aide,” ayon pa kay Go.

Dalawang ulit nang lumutang ang pangalan ni Lao sa ilalim ng administrasyong Duterte at sa parehong pagkakataon ay kaladkad pati ang tinaguriang pambansang alalay.
Subalit sino nga ba si Lloyd Christopher Lao?

Sa isang malalimang pagsasaliksik, si Lao ay isang fraternity brother ni Pangulong Rodrigo Duterte. Katunayan, naging miyembro ito ng Lex Talionis Fraternitas habang kumukuha ng abogasya sa Ateneo de Davao University.

Ganap siyang naging abogado taong 2005.

Hindi man maugong ang kanyang pangalan, ang kanyang pagiging isang taga-Davao ay isa nang malaking bentahe lalo pa’t karamihan sa mga itinalaga ni Pangulong Duterte ay mula sa nasabing rehiyon – at hindi pwedeng kwestyunin ang pagpili ng mga taong kanyang pagkakatiwalaan dahil iyon ay bahagi ng mandato ng isang halal na pangulo.

Unang pinasok ni Lao ang gobyerno noong ito’y nag-aaral pa ng abogasya. Siya ay itinalagang “researcher” ng isang konsehal Nonoy Galicia mula sa Davao City. Kalaunan ay nagbitiw makaraang pumasa sa bar exam.

Sumunod niyang pinasok ang tanggapan ng Housing and Land Use Regulatory Board (HLURB) sa Southern Mindanao kung saan siya saglit na nagsilbing arbiter.
Ito ang mga panahong si Lao ay tumatanggap ng mga kaso bilang isang private practicing lawyer.

Nang manalo bilang Pangulo si Rodrigo Duterte, si Lao ay itinalagang undersecretary sa Presidential Management Staff–Office of the Special Assistant to the President, isang tanggapan sa Malakanyang na nasa pangangasiwa ni Presidential Special Assistant at ngayo’y Senador Christopher Lawrence “Bong” Go.

Makalipas ang isang taon, siya ay pinagbitiw sa pwesto bilang Undersecretary at itinalaga bilang commissioner at chief executive officer ng HLURB.

Taong 2018, itinalaga naman si Lao na pamunuan ang mga confidential investigation kung saan bahagi ng kanyang tungkulin ay alamin ang background ng mga itinalaga at itatalaga pa lamang ng pangulo sa iba’t ibang pwesto sa gobyerno.

Taong 2020 naman nang magsimulang pamunuan ni Lao ang Procurement Service Office ng Department of Budget and Management bilang officer-in-charge.

Giit ni Lao, nag-aplay siya sa lahat ng posisyon sa gobyerno. Aniya, swerte ang nagdala sa kanya sa mga nasabing pwesto at hindi ang anomang kaugnayan kay Go.