BAGAMA’T nangunguna pa rin sa presidential survey, bumaba ng walong puntos ang rating ni Davao City Mayor Sara Duterte sa pinakahuling survey na isinagawa ng Pulse Asia Survey.
Nakakuha si Mayor Sara ng 20 percent rating na bumaba mula sa 28 percent score noong Hunyo.

Pumangalawa sa alkalde si dating Senador Ferdinand ‘Bongbong’ Marcos, Jr. na may 15% ratings; sinundan ni Manila Mayor Francisco ‘Isko Moreno’ Domagoso, 13% at Senator Emmanuel ‘Manny’ Pacquiao, 12%.

Hindi naglalayo sa puntos ang batang Duterte at si Marcos maging sa mga naunang survey.

Nasa ikalimang pwesto si Senator Grace Poe, 9% na sinundan ni Vice President Leni Robredo, 8% at Senator Panfilo Lacson, 6%.

Sa kabilang dako, nanguna si Senate President Vicente Sotto III sa pipiliin bilang vice president na may 25% ratings, sinundan ni Pangulong Rodrigo Duterte, 14%; Moreno, 12%, Marcos, 12% at Pacquiao, 7%.

“With utmost humility, I thank God and our ‘kababayans’ for the trust and confidence that many are placing on me and my dream of further serving the Filipino Family beyond the halls of the Senate. I will use this confidence booster to work harder as the top official of the Senate, as I present myself to our people as a worthy and reliable candidate for VP!” reaksyon ni Sotto.

Ang survey ay ginawa mula September 6 hanggang 11 sa 2,400 respondents sa buong bansa.

Nangunguna naman sa Senatorial survey ang Broadcaster na si Raffy Tulfo na may 55.2 percent rating na sinundan ni Taguig Rep. Alan Peter Cayetano, 53.6 percent.

Sumunod sa kanila sina Sorsogon Governor Francis “Chiz” Escudero, 47.9 percent;  Deputy House Speaker Loren Legarda, 47.2 percent; Domagoso, 42.3 percent at Pacquiao, 42.2 percent.
Kasama rin sa listahan ng pinipiling senatorial bets sina Lacson, 40.5 percent; Marcos, 40.2 percent, at TV host Willie Revillame, 36.6 percent.

Kasunod nila sina Public Works Secretary Mark Villar, 36.2 percent; dating vice president Jejomar Binay, 29.5 percent, at dating Senador Jinggoy Estrada, 29.4 percent.
Pasok din sina dating Senador Benigno “Bam” Aquino at Senate Majority Leader Juan Miguel “Migz” Zubiri na kapwa may 28.3 percent at si Senador Francis “Kiko” Pangilinan, 26.8 percent.

Hindi natinag

Ipinagkibit-balikat naman ng Malakanyang kung naungusan man ni Sotto si Pangulong Duterte sa pagkabise presidente.

Para kay Presidential spokesperson Harry Roque, ang surveys ay “snapshot” ng public opinion sa isang partikular na oras lamang.

“The latest Pulse Asia survey, conducted September 6 to 11, was done when aspirants, including President Rodrigo Roa Duterte who expressed interest to run for the Vice Presidency position, have

yet to file their Certificates of Candidacy, and there are uncertainties on PRRD’s electoral bid,” ayon kay Sec. Roque.

“Be that as it may, the President remains the candidate to beat in the 2022 elections,” diing pahayag ni Sec. Roque.

Sa ulat, bahagyang nagbago ang kompleksyon ng halalang pambansa sa 2022, kung paniniwalaan ang resulta ng panibagong survey na inilabas ng Pulse Asia kahapon. (DANG SAMSON-GARCIA/CHRISTIAN DALE)