INIHAYAG ni Executive Secretary Vic Rodriguez na isa sa mga prayoridad ng administrasyon ni Pangulong Ferdinand ‘Bongbong’ Marcos Jr., ay ang seguridad ng pagkain ng bansa.

Si Rodriguez ay dumalo nitong Martes sa pagdinig ng Senate Blue Ribbon Committee kaugnay sa kontrobersiyal na tangkang illegal importation ng asukal sa bansa.

“There is nothing more important than food security and its availability to the most ordinary Filipino,” ani Rodriguez sa mga mambabatas.

Sinabi ng opisyal na sinsero ang pamahalaan para mapabuti ang presyo ng bilihin sa bansa. “To achieve our goal that no Filipino would get hungry, because if neglected, it might cause social unrest.”

Ang ‘annual inflation rate’ ng bansa ay tumaas ng 6.4 percent nitong Hulyo 2022 mula sa 6.1 percent nitong Hunyo. Ito ang pinakamataas mula noong October 2018 na ayon sa mga eksperto ay dahil sa giyera ng Russia at Ukraine.

Kabi-kabilang paraan ang ginagawa ng pamahalaan upang matugunan ang labis na pagtaas ng presyo ng bilihin. Isa na rito ay ang pakikipag-usap sa mga may-ari ng malalaking supermarket sa bansa, tulad ng SM, Robinson’s at Puregold na tumugon sa ipinangakong ibaba hanggang P70 per kilo ang presyo ng asukal mula sa dating P110.

Bukod dito, walang humpay ang isinagawang operasyon ng mga awtoridad upang mahuli naman ang mga hoarders ng asukal na kumikita ng malaki miula sa artificial shortage.

Kontrobersyal na reso

Sa naturang Senate inquiry, sinabi ni Rodriguez na nagkaroon ng pakikipag-usap bago ang pagpapalabas ng kontrobersiyal na Sugar Order No. 4 (SO4) na inaprubahan ng nag-resign na Agriculture secretary Leocadio Sebastian kahit walang permiso mula kay Marcos na siya ring tumatayong Agriculture chief.

Sinabi ng opisyal na si Presidente Marcos mismo ang nag-utos sa kanya na ipawalang bisa ang SO4.

“I confronted Usec. Leo Sebastian and asked him why he did such a thing behind the President’s back — without the President’s knowledge and in an unfair and dishonorable way,” ani Rodriguez.

Idinagdag ni Rodriguez na hiniling din niya kay Sebastian at noo’y Sugar Regulatory Administration administrator Hermenegildo Serafica na magpaliwanag kung ano ang tunay na nangyari.

Hiniling na i-justify ng mga ito kung bakit minadali ang pagpapalabas ng SO4 kahit walang pahintulot ng Pangulong Marcos. Ang iniutos lamang aniya sa kanila ay bumuo ng importation plan at hindi ang maglabas ng ‘authority to import.’

Noong August 5, nagsumite si Sebastian kay Rodriguez ng memorandum na nirerekomenda ang pag-import ng 300,000 metric tons ng asukal.

Ipinaliwanag ni Rodriguez na sadyang hindi niya sinagot ang mga tanong ni Sebastian noong Aug. 6 to 10 dahil: “these are the matters that are still on the table of the acting secretary of the Department of Agriculture that he has yet to act upon and decide on.”

Solong desisyon ni Sebastian

Sariling desisyon ni Sebastian ang tangkang pag-angkat ng 300,000 metric tons ng asukal na hinarang ni Pangulong Marcos Jr.

Ito rin ang lumitaw sa joint hearing ng House committee on good government and public accountability at committee on agriculture, kung saan inamin ni Sebastian na hindi ito nagpaalam kay Marcos na lalagdaan na nito ang order.

“Kayo po ba nagsabi na pipirmahan ko ‘to, Mr, President?,” tanong ni San Jose del Monte City Rep. Rida Robes kay Sebastian na sinagot naman niya ng “No” kaya lumalabas na sarili nitong desisyon ang pag-angkat na sangkaterbang asukal.

Ginisa naman ni Dasmariñas City Rep. Elpidio Barzaga si Serafica hinggil sa isang ulat sa diyaryo na nagsasabing inaprubahan nito ang pag-angkat ng asukal para maiwasan ang shortage sa supply.

“I categorically deny that as administrator…I do not like to preempt decision of President,” ani Serafica, bilang isa sa signatory sa SO No. 4.

Inamin din nito na walang nangyaring consultative meeting bago ilabas at lagdaan ang SO No. 4 dahil wala umano ito sa posisyon na magpatawag ng ganitong uri ng pulong. (NOEL ABUEL/BERNARD TAGUINOD)