BINATIKOS ng National Task Force to End Local Communist Armed Conflict (NTF-ELCAC) si presidential candidate at Vice President Leni Robredo dahil sa pagsisinungaling ukol sa diumano’y kasunduan sa mga miyembro ng Communist Party of the Philippines-New People’s Army-National Democratic Front (CPP-NPA-NDF).

Ang pahayag na ito ni NTF-ELCAC Spokesperson for Sectoral Concerns and Communications Undersecretary Lorraine Marie Badoy ay bilang tugon sa pagtanggi ni Robredo sa mga usap-usapan na nag-uugnay sa kanya at sa kanyang mga volunteer sa CPP-NPA-NDF.

Sinabi ni Badoy na kailangan nang tigilan ng kampo ni Robredo ang pagsisinungaling sa kasunduan. Tinukoy nito ang tweet umano ni CPP founder, Jose Maria “Joma” Sison ng kanyang opisyal na pag-endorso sa kandidatura ni Robredo.

“VP Leni Robredo’s camp should stop insulting the intelligence of the Filipino people by pretending they have not made a pact with the devil, the communist terrorist CPP-NPA-NDF,” ayon kay Badoy.

Sinabi pa niya na ang Makabayan Bloc, na kanyang inilarawan bilang “urban operatives” ng CPP-NPA-NDF ay inendorso rin si Robredo.

“This endorsement of Leni Robredo is an endorsement of the Central Committee of the CPP-NPA-NDF, an organization that has been designated a terrorist organization by the Anti-Terrorism Council and that has also been declared a terrorist organization by the Philippines, US, UK, New Zealand, EU, Australia and Canada,” dagdag na pahayag nito.

Sinabi ni Badoy na bumuo si Robredo ng isang “tactical alliance” kasama ang communist terrorists na aniya’y “mutually beneficial to the both of them.”

“And anything that benefits this terrorist organization means more pain and suffering for the Filipino people,” aniya pa rin.

Tinukoy ang March 4 campaign sortie ni Robredo sa Cavite, sinabi ni Badoy na kasama ni Robredo sa stage ang communist “operatives.”

Sinabi pa ni Badoy na iginiit ni Robredo ang abolisyon o paglansag sa NTF-ELCAC at makailang ulit na ginagamit ang salitang “red-tagging” para patahimikin ang mga nagsasalita ng katotohanan tungkol sa communist fronts.

Ipinangako rin aniya ni Robredo na ipagpapatuloy nito ang inilarawan niyang “bogus” peace talks sakaling mahalal na pangulo ng bansa.

“We are sorry to tell those who have given their precious trust to the VP that she has betrayed us all,” ayon kay Badoy.

“The only way Robredo could “redeem” herself is to publicly denounce the CPP-NPA-NDF and all the atrocities they have committed and work with the NTF-ELCAC,” aniya pa rin.
Dapat ding hilingin ni Robredo sa Makabayan Bloc na gawin ang kahalintulad na hakbang.

“We therefore await the Vice President’s public condemnation of the CPP-NPA-NDF and her open invitation for the KABAG to do the same. Otherwise, we will rightfully conclude that she is not worthy of our trust and that she values the few votes the CPP-NPA-NDF claims they can give her far more than our lives and the lives of our children and the destiny of our country,” anito.

Kamakailan sa isang panayam kay Pangulong Rodrigo Roa Duterte na inere sa SMNI, sinabi nito na nakatanggap siya ng intelligence report ukol sa di umano’y “groupings” ng ilang miyembro ng oposisyon at communist rebels para guluhin ang May 2022 polls.

Nauna rito, sinabi naman ng Barry Gutierrez, tagapagsalita ni Robredo na ang “blatant” at “persistent” red-tagging sa kanilang kampo ay “new low”, sinabi nito na ang rival candidates ni Robredo ay nagpipilit na patamlayin ang enerhiya ng kampanya ng Bise-Presidente.

Itinanggi naman ni CPP spokesperson Marco Valbuena ang ulat na may pag-uusap sila kay Robredo o sa kahit na sinomang presidential candidates ukol sa pagbuo ng coalition government.
Ang CPP-NPA ay kasama sa listahan ng Estados Unidos, European Union, the United Kingdom, Australia, Canada, New Zealand, at Pilipinas bilang terrorist organization. (CHRISTIAN DALE)