NAGHAIN ng reklamo sa Quezon City Regional Trial Court ang isang commissioner ng National Commission on Muslim Filipinos (NCMF) laban sa pinuno at iba pang opisyal ng ahensya dahil
umano sa pagtangging ipalabas ang “extraordinary allowance” at reimbursements ng una.

Sa kanyang Petition for Mandamus, hiniling din ni NCMF Commissioner Abubakar M. Mangelen, ang pagpapatupad ng korte sa appointment ng dalawang coterminous staff ng kanyang opisina.

Inakusahan ni Mangelen si Sec. Saidamen Pangarungan, gayundin sina Mr. Khamil Manalundong, NCMF acting chief of Finance Management Service (FMS) at Ms. Anisa Lomondot, ng “unlawful
refusal and/or delay to perform their ministerial duties” partikular ang pagpapalabas ng kanyang extraordinary and miscellaneous benefits para sa April, May at June 2020.

“On July 22, 2020, Petitioner wrote another memo-letter to respondent Secretary Saidamen B. Pangarungan, thru Chief Khamil Manalundong, asserting his claim. But up to present, Secretary
Pangarungan, with co-respondents, have not release/pay the claims and appointment papers of my coterminous staff,” sabi ni Mangelen sa kanyang complaint affidavit.

“By reason of the Secretary unlawful refusal and/or delay to perform his ministerial duty, plaintiff suffered damages and attorney’s fees of 100,000.00 (pesos), which should be assessed against the respondents,” dagdag ng NCMF commissioner.

Noong August 8, 2020, pinadalhan din ni Mangelen ng memorandum si Pangarungan upang hingin ang pagpapalabas ng Maintenance and Other Operating Expenses (MOOE) budget ng kanyang
opisina para sa April, May at June 2020.

Nauna rito, ilang criminal at administrative charges ang isinampa laban sa kontrobersiyal na NCMF at hinihintay pa ang kaukulang aksiyon sa mga ito ng Office of the Ombudsman, Presidential Anti- Crime Commission (PACC) at Civil Service Commission (CSC).

Matatandaan si Pangarungan ay umani rin ng mga batikos at pagpuna mula sa hanay ng highly respected Muslim religious leaders, kabilang ang Sheikhs mula sa iba’t ibang lugar sa bansa at
maging kay Sulu Governor Abdusakur Tan dahil umano sa incompetence at pagkakasangkot sa graft and corruption. (CESAR BARQUILLA)